Manoramaonline.com no longer supports Internet Explorer 8 or earlier. Please upgrade your browser.  Learn more »

അമ്മമാരുടെ കൈപ്പുണ്യം നിറഞ്ഞ ഏഴ് രുചിക്കൂട്ടുകൾ

7-recipes

പ്രളയത്തെ അതിജീവിച്ച കുടുംബങ്ങൾ സാധാരണ ജീവിതത്തിലേക്ക്... ബ്രഡ്ഡും ബണ്ണും കഴിച്ചു പിടിച്ചുനിന്ന നാളുകൾ കഴിഞ്ഞു. ഇനി വായ്ക്കു രുചിയായി എന്തെങ്കിലുമൊക്കെ കഴിക്കാം. അതിനായി ചില വിഭവങ്ങളുടെ കുറിപ്പടികൾ. എല്ലാം അമ്മമാരുടെ കൈപ്പുണ്യം....

1) മത്തങ്ങാത്തോൽ ചമ്മന്തി

വെളിച്ചെണ്ണ – രണ്ടു ചെറിയ സ്പൂൺ
വറ്റൽമുളക് – നാല്–അഞ്ച്
ഉഴുന്നുപരിപ്പ് – ഒരു വലിയ സ്പൂൺ
കായം – ഒരു കഷണം
കടലപ്പരിപ്പ് – കാൽ ചെറിയ സ്പൂൺ
മത്തങ്ങയുടെ തൊലി കഷണങ്ങളാക്കിയത് – രണ്ടു കപ്പ്
വാളൻപുളി – ഒരു നെല്ലിക്ക വലുപ്പം
ഉപ്പ് – പാകത്തിന്
പാകം ചെയ്യുന്ന വിധം
∙ ചീനച്ചട്ടിയിൽ വെളിച്ചെണ്ണ ചൂടാക്കി രണ്ടാമത്തെചേരുവ ചുവക്കെ വറുക്കുക. ചൂടാറുമ്പോൾ പൊടിച്ചു വയ്ക്കുക.
∙ ഇതേ വെളിച്ചെണ്ണയിൽ മത്തങ്ങാത്തൊലി വഴറ്റി ചൂടാറുമ്പോൾ പൊടിച്ച കൂട്ടിനൊപ്പം നാലാമത്തെ ചേരുവയും ചേർത്ത് അരയ്ക്കണം.
∙ആവശ്യമെങ്കിൽ സ്വാദ് ക്രമീകരിക്കാൻ അൽപം ശർക്കര ചേർക്കാം.

2) തവിടപ്പം

തവിട് – രണ്ടു കപ്പ്
ശർക്കര – ഒരു ഉണ്ട
തേങ്ങ – ഒരു മുറി, ചുരണ്ടിയത്
പാകം ചെയ്യുന്ന വിധം
∙തവിട് അൽപാൽപം വെള്ളം തളിച്ചു കുഴയ്ക്കുക.
∙ഒരു പാത്രത്തിൽ രണ്ടാമത്തെ ചേരുവ യോജിപ്പിച്ചു വയ്ക്കണം.
∙പൂവരശ്ശിന്റെ ഇലയിലോ വാഴയിലയിലോ തവിടുമിശ്രിതം കനം കുറച്ചു പരത്തി നടുവിൽ തേങ്ങാമിശ്രിതം വച്ചു മടക്കുക.
∙ആവിയിൽ വേവിക്കുകയോ കനലിൽ ചുട്ടെടുക്കുകയോ ഓട്ടട പോലെ വറുത്തെടുക്കുകയോ ചെയ്യാം.

3) ചക്കക്കുരു പാട ഉപ്പേരി

1. ചക്കക്കുരുവിന്റെ പാട – രണ്ടു കപ്പ്
2. ഉപ്പ് – പാകത്തിന്
3. വെളിച്ചെണ്ണ – വറുക്കാൻ ആവശ്യത്തിന്
പാകം ചെയ്യുന്ന വിധം
∙ചക്കക്കുരുവിന്റെ പുറത്തെ പാടയിൽ ഉപ്പു പുരട്ടി വയ്ക്കുക.
∙ചൂടായ വെളിച്ചെണ്ണയിൽ വറുത്തു കോരിയെടുക്കാം.

തയാറാക്കിയത്: ശ്യാമള നായർ

4) മീൻ പാലുപിഴിഞ്ഞ കറി

fish-mango-curry-recipe

മീൻ – അരക്കിലോ
തേങ്ങ – ഒരു വലുത്
വെളിച്ചെണ്ണ – രണ്ടു വലിയ സ്പൂൺ
ചുവന്നുള്ളി അരിഞ്ഞത് – നാലു െചറിയ സ്പൂൺ
ഇഞ്ചി അരിഞ്ഞത് – രണ്ടു ചെറിയ സ്പൂൺ
പച്ചമുളക് – മൂന്ന്, അറ്റം പിളർന്നത്
മുളകുപൊടി – ഒന്നര ചെറിയ സ്പൂൺ
മല്ലിപ്പൊടി – ഒരു വലിയ സ്പൂൺ
മഞ്ഞൾപ്പൊടി – കാൽ െചറിയ സ്പൂൺ
നാടൻ മാങ്ങ – മൂന്നു കഷണം, തൊലി കളഞ്ഞത്
ചുവന്നുള്ളി – രണ്ട്, അരിഞ്ഞത്
കറിവേപ്പില – രണ്ടു തണ്ട്

പാകം ചെയ്യുന്ന വിധം
∙മീൻ വൃത്തിയാക്കി ചെറിയ കഷണങ്ങളാക്കി വയ്ക്കണം.
∙തേങ്ങ ചുരണ്ടിപ്പിഴിഞ്ഞ് ഒരു കപ്പ് ഒന്നാംപാലും ഒന്നരക്കപ്പ് രണ്ടാംപാലും എടുക്കുക.
∙പാനിൽ വെളിച്ചെണ്ണ ചൂടാക്കി നാലാമത്തെ േചരുവ വഴറ്റണം.
∙ഇതിലേക്ക് അഞ്ചാമത്തെ േചരുവ അൽപം വെള്ളത്തിൽ കുഴച്ചതു ചേർത്തിളക്കി നന്നായി വഴറ്റുക.
∙മസാല മൂത്ത മണം വരുമ്പോൾ മാങ്ങാക്കഷണങ്ങൾ ചേർത്തിളക്കി, രണ്ടാം പാലും േചർത്തിളക്കുക.
∙മാങ്ങ വെന്തു തുടങ്ങുമ്പോൾ മീൻ കഷണങ്ങളും ഉപ്പും േചർത്തിളക്കണം.
∙മീൻ വെന്ത ശേഷം ഒന്നാംപാൽ േചർത്ത് ഇളക്കുക.
∙കറി നന്നായി ചൂടായി തിളയ്ക്കും മുൻപ് വാങ്ങി വയ്ക്കുക.
∙അൽപം വെളിച്ചെണ്ണ ചൂടാക്കി ചുവന്നുള്ളിയും കറിവേപ്പിലയും മൂപ്പിച്ചു കറിയിൽ ചേർക്കുക.
∙ഗ്രേവി കൂടുതൽ ആവശ്യമാണെങ്കിൽ കൂടുതൽ തേങ്ങാപ്പാൽ ചേർക്കാം.

5) കോഴിപ്പിടി

pidi

അരിപ്പൊടി – ഒരു കപ്പ്
ഉപ്പ് – പാകത്തിന്
നെയ്യ് – ഒരു വലിയ സ്പൂൺ
തേങ്ങ – ഒന്ന്
എണ്ണ – പാകത്തിന്
ഇഞ്ചി – ഒന്നരയിഞ്ചു കഷണം, ചതച്ചത്
വെളുത്തുള്ളി ചതച്ചത് – ഒന്നര െചറിയ സ്പൂൺ
സവാള – രണ്ട്, പൊടിയായി അരിഞ്ഞത്
പച്ചമുളക് – മൂന്ന്, അരിഞ്ഞത്
കറുവാപ്പട്ട – മുക്കാൽ െചറിയ സ്പൂൺ
ഗ്രാമ്പൂ – മുക്കാൽ‌ െചറിയ സ്പൂൺ
പെരുംജീരകം – അര െചറിയ സ്പൂൺ
കുരുമുളക് – രണ്ടു െചറിയ സ്പൂൺ
മല്ലിപ്പൊടി – ഒന്നര വലിയ സ്പൂൺ
മുളകുപൊടി – ഒരു െചറിയ സ്പൂൺ
മഞ്ഞൾപ്പൊടി – മുക്കാൽ െചറിയ സ്പൂൺ
ചിക്കൻ – ഒന്ന്, വൃത്തിയാക്കി ചെറിയ കഷണങ്ങളാക്കിയത്
കറിവേപ്പില – രണ്ടു തണ്ട്
ചുവന്നുള്ളി – മൂന്ന്, അരിഞ്ഞത്

പാകം ചെയ്യുന്ന വിധം
∙ഒരു വലിയ പാത്രത്തിൽ വെള്ളം തിളപ്പിച്ച് അരിപ്പൊടിയും ഉപ്പും േചർത്തിളക്കി ഇടിയപ്പത്തിന്റെ പാകത്തിനു വേവിക്കണം. ഇതിൽ നെയ്യ് ചേർത്തു നന്നായി കുഴയ്ക്കണം.
∙ഇതിൽ നിന്നു നെല്ലിക്ക വലുപ്പത്തിലുള്ള ഉരുളകളുണ്ടാക്കി ആവിയിൽ വേവിക്കുക.
∙എണ്ണ ചൂടാക്കി ഇഞ്ചിയും വെളുത്തുള്ളിയും ചതച്ചതു ചേർത്തു രണ്ടു മിനിറ്റ് വഴറ്റിയ ശേഷം സവാളയും പച്ചമുളകും േചർത്തു നന്നായി വഴറ്റണം.
∙ഇളംബ്രൗൺ നിറമാകുമ്പോൾ ഏഴാമത്തെ േചരുവ അരച്ചതു േചർത്തു വഴറ്റണം.
∙ മസാല മൂത്ത മണം വരുമ്പോൾ ചിക്കൻ കഷണങ്ങൾ േചർത്തിളക്കി വരട്ടി വേവിക്കുക.
∙ഇതിലേക്കു തേങ്ങ ചുരണ്ടിപ്പിഴിഞ്ഞ രണ്ടാംപാൽ േചർത്തിളക്കി ചിക്കൻ മുക്കാൽ വേവാകുമ്പോൾ വേവിച്ച പിടിയും േചർത്തിളക്കുക.
∙ചിക്കൻ വെന്ത ശേഷം ഒന്നാംപാലും േചർത്തിളക്കി വാങ്ങണം.
∙കറിവേപ്പിലയും ചുവന്നുള്ളിയും അൽപം വെളിച്ചെണ്ണയിൽ മൂപ്പിച്ചു േചർക്കുക.

vettayappam-002

6) വട്ടയപ്പം
പച്ചരി – അരക്കിലോ
തേങ്ങ – രണ്ടു ചെറുത്
യീസ്റ്റ് – മുക്കാൽ െചറിയ സ്പൂൺ
പഞ്ചസാര – അര െചറിയ സ്പൂൺ
ചെറുചൂടുവെള്ളം – അരക്കപ്പ്
പഞ്ചസാര – ഒരു കപ്പ്
ഉണക്കമുന്തിരി – അലങ്കരിക്കാൻ
പാകം ചെയ്യുന്ന വിധം
∙പച്ചരി അരമണിക്കൂർ കുതിർത്ത ശേഷം ഊറ്റി തോർത്തിൽ നിരത്തി, വെള്ളം മുഴുവൻ കളഞ്ഞെടുക്കണം.
∙തേങ്ങ ചുരണ്ടിപ്പിഴിഞ്ഞ് ഒന്നരക്കപ്പ് ഒന്നാം പാലും രണ്ടു കപ്പ് രണ്ടാംപാലും പിഴിഞ്ഞെടുത്തു വയ്ക്കണം.
∙തേങ്ങയിൽ നിന്നു മുഴുവൻ പാലും പിഴിഞ്ഞു മാറ്റിയ ശേഷം അതും തരിയും േചർത്ത് ഇടിച്ചു പൊടിക്കണം.
∙പൊടിച്ച അരി–തേങ്ങ മിശ്രിതം ഇടഞ്ഞെടുക്കുക. ഇതു വീണ്ടും പൊടിച്ച ശേഷം ഇടഞ്ഞെടുക്കുക. ഇങ്ങനെ അരക്കപ്പ് പൊടി ബാക്കി വരുന്നതു വരെ പൊടിച്ച് ഇടയണം. ഇതാണ് തരി.
∙ഈ തരിയിൽ ഒന്നരക്കപ്പ് രണ്ടാംപാൽ ചേർത്ത് അടുപ്പത്തു വച്ചു കുറുക്കി കപ്പി കാച്ചിയെടുക്കണം.
∙മൂന്നാമത്തെ േചരുവ യോജിപ്പിച്ച്, പൊങ്ങാനായി മാറ്റിവയ്ക്കുക. പൊങ്ങി വരുമ്പോൾ അരിപ്പൊടി–തേങ്ങ മിശ്രിതത്തിൽ േചർക്കുക.
∙പഞ്ചസാര അരക്കപ്പ് രണ്ടാംപാലിൽ ചേർത്തു ചെറുതീയിൽ വച്ചിളക്കി അലിയിച്ച്, കപ്പിയിൽ ചേർത്തിളക്കുക.
∙ചൂടാറിയ ശേഷം ഈ പാൽ മിശ്രിതം, അരി–തേങ്ങാ മിശ്രിതത്തിൽ േചർത്തിളക്കുക. ഒന്നാംപാലും ചേർത്തു കട്ട കെട്ടാതെ കലക്കി, പൊങ്ങാൻ വയ്ക്കണം.
∙മയം പുരട്ടിയ തട്ടിൽ ഒഴിച്ച് ആവി വരുന്ന അപ്പച്ചെമ്പിന്റെ തട്ടിൽ വച്ച് മുകളിൽ ഉണക്കമുന്തിരി നിരത്തി ആവിയിൽ വേവിച്ചെടുക്കുക.

തയാറാക്കിയത്: അന്നമ്മ ചാക്കോള

7) ചെറുചേമ്പും ചാളയും

fishcurry

1.ചാള – ഒരു കിലോ
2.കുടംപുളി – മൂന്നു ചുള
3.െചറുചേമ്പ് – അരക്കിലോ
4.മുളകുപൊടി – ഒരു വലിയ സ്പൂൺ
മഞ്ഞൾപ്പൊടി – അര െചറിയ സ്പൂൺ
ഉപ്പ് – പാകത്തിന്
ചുവന്നുള്ളി – 10
കറിവേപ്പില – രണ്ടു തണ്ട്
ഇഞ്ചി – ഒരു കഷണം, അരിഞ്ഞത്
പച്ചമുളക് – മൂന്ന്, അരിഞ്ഞത്
വെളുത്തുള്ളി – മൂന്ന് അല്ലി, അരിഞ്ഞത്
വെളിച്ചെണ്ണ – പാകത്തിന്
പാകം ചെയ്യുന്ന വിധം
∙ചാള വെട്ടിക്കഴുകി വൃത്തിയാക്കി വയ്ക്കണം.
∙കുടംപുളി രണ്ടു കപ്പ് വെള്ളത്തിൽ കുതിരാൻ വയ്ക്കുക.
∙ചെറുചേമ്പു കഴുകി വൃത്തിയാക്കി രണ്ടായി മുറിച്ചു വയ്ക്കണം.
∙അതിലേക്കു നാലാമത്തെ േചരുവ േചർത്തു നന്നായി തിരുമ്മി യോജിപ്പിച്ചു വയ്ക്കണം.
∙10 മിനിറ്റിനു ശേഷം ഇതിലേക്കു പുളിയും വെള്ളവും േചർത്തു വേവിക്കുക.
∙ചേമ്പ് മുക്കാൽ വേവാകുമ്പോൾ ചാള വൃത്തിയാക്കിയതും ചേർത്തു നന്നായി വേവിച്ചെടുക്കണം.
തയാറാക്കിയത്: റോസി വർഗീസ്.

കടപ്പാട്: വനിത പാചകം മാസിക

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.