ചിക്കന്‍  പുലാവ് ഇങ്ങനെ തയാറാക്കി നോക്കൂ...

രസമുകുളങ്ങൾക്ക് പുതു രുചി സമ്മാനിക്കുന്നൊരു ചിക്കൻ പുലാവ് തയാറാക്കിയാലോ?

ചേരുവകൾ

ചിക്കൻ മാരിനേറ്റ് ചെയ്യാൻ

• ചിക്കൻ – 1 കിലോഗ്രാം
• കുരുമുളകുപൊടി – 1 ടേബിൾസ്പൂൺ
• കാശ്മീരി ചില്ലിപൗഡർ – 1 ടേബിൾസ്പൂൺ
• ഉപ്പ് -1ടീസ്പൂൺ

ഗ്രേവി തയാറാക്കാൻ

• സവാള – 3
• തക്കാളി – 2
• എണ്ണ – 2 ടേബിൾസ്പൂൺ + 1/4 കപ്പ്
•  ഉപ്പ് –  1/2 ടീസ്പൂൺ
• ഗ്രാമ്പു – 4
• കറുവപ്പട്ട – 4 ചെറിയ കഷണം
• ഏലയ്ക്ക – 4
• വറ്റൽ മുളക് – 4

ചോറ് തയാറാക്കാൻ

• ബസ്മതി/ജീരകശാല - 4 കപ്പ്
  
• ഏലയ്ക്ക -2
• കറുവപ്പട്ട -2 ചെറിയ കഷണം
• ഗ്രാമ്പൂ - 2
• നെയ്യ് -1 ടേബിൾസ്പൂൺ
• എണ്ണ - 2 ടേബിൾസ്പൂൺ
• വെള്ളം - 6 കപ്പ്
• ഉപ്പ് – 2 1/2 ടീസ്പൂൺ

തയാറാക്കുന്ന വിധം

• ചിക്കന്‍ മാരിനേറ്റ് ചെയ്യാം. അതിനുവേണ്ടി 1ടേബിള്‍ സ്പൂണ്‍ വീതം കുരുമുളകു പൊടിയും കാശ്മിരി  മുളകുപൊടിയും കഴുകി വൃത്തിയാക്കിയ ചിക്കന്‍ കഷ്ണങ്ങളിലേക്ക് ചേര്‍ക്കുക. കൂടാതെ 1ടീസ്പൂണ്‍ ഉപ്പും ചേര്‍ത്ത് നന്നായി തേച്ച് പിടിപ്പിക്കുക.ഇത് 1/2 മണിക്കൂര്‍ ഫ്രിജില്‍ സൂക്ഷിക്കുക.
  
• ബസ്മതി  അല്ലെങ്കിൽ ജീരകശാല അരി നന്നായി കഴുകി വെള്ളത്തില്‍ 1/2 മണിക്കൂർ മുതല്‍ 1 മണിക്കൂര്‍ വരെ കുതിര്‍ത്ത് വയ്ക്കുക.
  
• സവാളയും തക്കാളിയും മിക്സിയില്‍ വെള്ളം ചേര്‍ക്കാതെ അരച്ചെടുക്കുക.
  
• മാരിനേറ്റ് ചെയ്ത് ഫ്രിജില്‍ വച്ചിട്ടുള്ള ചിക്കന്‍ എണ്ണയില്‍ വറുത്ത് മാറ്റിവയ്ക്കാം. ഒരു പാനില്‍ 2 ടേബിള്‍സ്പൂണ്‍ എണ്ണ ചേര്‍ത്ത ശേഷം അതിലേക്ക് 4 ഗ്രാമ്പൂ, 4 ഏലയ്ക്ക, 4 ചെറിയ കഷ്ണം കറുവപ്പട്ട, 4 വറ്റല്‍ മുളക് എന്നിവ ചേര്‍ക്കുക. ഒന്ന് മൂപ്പിച്ച ശേഷം അതിലേക്ക് അരച്ചു വച്ച സവാള – തക്കാളി മിക്സ് ചേര്‍ക്കുക. 1/2 ടീസ്പൂണ്‍ ഉപ്പും ചേര്‍ത്ത് കുറുകി വരുമ്പോള്‍ വറുത്തു മാറ്റിവച്ച ചിക്കന്‍ കൂടെ ചേര്‍ത്ത് നന്നായി  വറ്റിക്കുക. അല്പം മല്ലിയിലയും ചേര്‍ത്ത് അടുപ്പില്‍ നിന്ന് മാറ്റാം
  
• മസാല തയാറാക്കുന്ന അതേ സമയം  രണ്ടാമത്തെ അടുപ്പില്‍ ചോറ് തയാറാക്കാം. അതിനു വേണ്ടി ഒരു പാന്‍ വച്ച് അതിലേയ്ക്ക്  1 ടേബിള്‍ സ്പൂണ്‍ നെയ്യും 2 ടേബിള്‍ സ്പൂണ്‍ എണ്ണയും ചേര്‍ക്കുക. അതിലേയ്ക്ക്  2 ഏലയ്ക്ക,  2ഗ്രാമ്പൂ, 1 കഷ്ണം കറുകപ്പട്ട എന്നിവ ചേര്‍ക്കുക. അതിലേയ്ക്ക് 6 കപ്പ് വെള്ളം 21/2 ടീസ്പൂണ്‍ ഉപ്പ് എന്നിവ ചേര്‍ത്ത് തിളയ്ക്കുമ്പോള്‍ കുതിര്‍ത്ത് ഊറ്റി വെച്ച അരി ചേര്‍ത്ത്  കൊടുക്കുക.നന്നായി  മിക്സ്‌ ചെയ്യുക. അടച്ച് വെച്ച്  തിളച്ച ശേഷം തീ കുറച്ച് വെച്ച് വേവിക്കുക. ഇടയ്ക്ക് ഒന്ന് ഇളക്കിയിടുക. വെള്ളം വറ്റിക്കഴിഞ്ഞാല്‍ തീയണച്ച് 5 മിനിറ്റ് അടച്ച് തന്നെ സൂക്ഷിക്കുക.
  
• അതിനു ശേഷം ചോറ് കുറച്ച് നീക്കി തയാറാക്കിയ മസാല ചേര്‍ത്ത്  മുകളില്‍ ചോറ് ചേര്‍ക്കുക. രണ്ട് മൂന്ന് ഭാഗത്തായി  ഇതേ പോലെ മസാല  ചേര്‍ത്ത് കൊടുക്കാം.
  
• ഇനി പാത്രം അലൂമിനിയം ഫോയില്‍ കൊണ്ടു കവര്‍ ചെയ്ത് അടച്ചു വെച്ച് അടുപ്പിന്‍റെ മുകളില്‍ പഴയ ഒരു തട്ട് വച്ച ശേഷം തീ കുറച്ചു വെച്ച് 15 മിനിറ്റ് വേവിക്കുക. ശേഷം തീ അണച്ച് 5 മിനിറ്റ് കഴിഞ്ഞ് ചൂടോടു കൂടെ വിളമ്പാം. തൈര്, അച്ചാര്‍, സാലഡ്, ചട്നി ഇതില്‍ ഏതും നമുക്ക് സൈഡ് ഡിഷായി ഉപയോഗിക്കാം.