പ്രഷർ കുക്കറിൽ ഉണ്ടാക്കാം പെർഫെക്റ്റ് ബണ്ണും ബ്രഡും 

ഇനി ബ്രഡ് ഉണ്ടാക്കാൻ അവ്നും വേണ്ട ലോഫ് പാനും വേണ്ട. മുട്ടയും പാലുമൊന്നുമില്ലാതെ കുക്കറിലുണ്ടാക്കാം സൂപ്പർ സോഫ്റ്റായ കിടിലൻ ബ്രഡും ബണ്ണും. അതും വളരെ എളുപ്പത്തിൽ വീട്ടിലുള്ള ചേരുവകൾ കൊണ്ട് തയാറാക്കാം.

ചേരുവകൾ

• ഇൻസ്റ്റന്റ് യീസ്റ്റ് – 2 ടീസ്പൂൺ 
  
• പഞ്ചസാര –1 ടേബിൾ സ്പൂൺ
• ഇളം ചൂടുള്ള വെള്ളം – 1 കപ്പ് (ഏകദേശം) 
• മൈദ – 3 കപ്പ് 
• ഓയിൽ – 3 ടേബിൾ സ്പൂൺ 
• ഉപ്പ് – ആവശ്യത്തിന് 
• ബട്ടർ – 2 ടേബിൾ സ്പൂൺ 
• വെളുത്ത എള്ള് (അലങ്കരിക്കാൻ)

തയാറാക്കുന്ന വിധം 

• ഒരു പാത്രത്തിൽ രണ്ട് ടീസ്പൂൺ യീസ്റ്റ്, 1 ടേബിൾസ്പൂൺ പഞ്ചസാര, അര കപ്പ് ഇളം ചൂടുവെള്ളം എന്നിവ ചേർത്ത് 10 മിനിറ്റ് പുളിക്കാൻ വയ്ക്കുക.
• ഇതിലേക്ക് 3 കപ്പ് മൈദയും 3 ടേബിൾസ്പൂൺ ഓയിലും അര ടീസ്പൂൺ ഉപ്പും ചേർത്ത് ഇളം ചൂട് വെള്ളത്തിൽ കുഴക്കുക. ഇതിലേക്ക് 2 ടേബിൾസ്പൂൺ ബട്ടർ ചേർത്ത് മയപ്പെടുന്നത് വരെ കുഴയ്ക്കുക. മുകളിൽ ഓയിൽ പുരട്ടി അടച്ച് വച്ച് ഒരു മണിക്കൂർ പൊങ്ങാൻ വയ്ക്കുക.
• ശേഷം മാവ് പകുതിയാക്കി ഒരു ഭാഗം ബ്രഡിനും ബാക്കി ഭാഗം ബണ്ണിനും ഉരുട്ടി വച്ച് കവർ ചെയ്ത് പൊങ്ങാൻ വയ്ക്കുക.
• ഇതിനു മുകളിൽ ബട്ടറോ തണുത്ത വെള്ളമോ പാലോ ബ്രഷ് ചെയ്ത് ബേക്ക് ചെയ്യാം.ആവശ്യമെങ്കിൽ മുകളിൽ വെളുത്ത എള്ളും ഇട്ടു കൊടുക്കുക.
• പ്രഷർ കുക്കറിന്‍റെ വെയ്റ്റ് എടുത്ത് മാറ്റി അകത്തു ഉയരത്തിനു എന്തെങ്കിലും തട്ട് വയ്ക്കുക. കുക്കർ 5 മിനിറ്റ് ചൂടാക്കിയ ശേഷം തയാറാക്കിയ ബണ്ണിന്റെയും ബ്രഡിന്റെയും മാവ് ഇതിൽ അടച്ചു വച്ച് ചെറിയ തീയിൽ 25 മുതൽ 30 മിനിറ്റ് വരെ അല്ലെങ്കിൽ മുകൾ ഭാഗം ബ്രൗൺ ആകുന്നത് വരെ വേവിക്കുക.
  
• പുറത്തെടുത്ത ശേഷം തുണി കൊണ്ട് കവർ ചെയ്ത് അഞ്ചു മിനിറ്റ് വയ്ക്കുക. എന്നിട്ട് ബട്ടർ തടവി ഉപയോഗിക്കാം.
  

English Summary : Homemade Bread And Bun, Pressur Cooker Baking