പഞ്ഞിപോലെ മൃദുലമായ നാൻ, മുട്ട ഒട്ടും ചേർക്കാതെ

ഉത്തരേന്ത്യൻ റെസ്റ്റാറന്റുകളിൽ ചപ്പാത്തി, തന്തൂർ റൊട്ടി എന്നിവ പോലെ  വിളമ്പുന്ന മറ്റൊരു സ്വാദിഷ്ടമായ വിഭവമാണ്  "നാൻ ".  മുട്ട ചേർക്കാത്തതിനാൽ  സസ്യാഹാരികൾക്കും ഇത് പ്രിയപ്പെട്ടതാവും. വളരെ എളുപ്പം  വീടുകളിൽ ഇത് പാകം ചെയ്തെടുക്കാം. മൈദയാണ് ഇതിലെ പ്രധാന ചേരുവ.    

ചേരുവകൾ

• മൈദ - 2 കപ്പ് 
• പഞ്ചസാര - 2 ടീ സ്പൂൺ 
• യീസ്റ്റ്  - 1 ടേബിൾ സ്പൂൺ 
• ചൂട് പാൽ - 2 ടേബിൾ സ്പൂൺ. 

യീസ്റ്റും പഞ്ചസാരയും ചൂടുള്ള പാലിൽ നന്നായി കലർത്തി അര മണിക്കൂർ വയ്ക്കുക. 

• ഉപ്പ് - 1 1/2 ടീ സ്പൂൺ 
  
• എണ്ണ - 2 ടേബിൾ സ്പൂൺ 
• ചൂട് പാൽ - 1/4 ലിറ്റർ 

മൈദയിൽ ചൂട് പാൽ, എണ്ണ, ഉപ്പ് എന്നിവ ഒഴിച്ച് തയാറാക്കി വച്ച യീസ്റ്റ് മിശ്രിതവും കലർത്തി നന്നായി കുഴക്കുക. കുഴച്ചുവെച്ച മാവിനു മുകളിൽ 1ടേബിൾ സ്പൂൺ എണ്ണ കൂടി ഒഴിക്കുക. ഈ മാവ് നല്ല കട്ടിത്തുണികൊണ്ട് 2 മണിക്കൂർ മൂടിവെച്ചശേഷം ഉരുളകളാക്കിയെടുത്തു കനത്തിൽ പരത്തിയെടുക്കുക. പരത്തുമ്പോൾ കുറച്ച് എള്ള് കൂടി ചേർക്കുക. ശേഷം ഇത് ചട്ടിയിൽ 2 വശവും പൊള്ളിവരുംവരെ ചുട്ടെടുക്കുക. ഈ സമയത്ത് നെയ്യും ചില്ലി ഫ്ലേക്‌സും ചേർത്തു കൊടുക്കാം.