മീനില്ലാത്ത മീൻ കറി, ചൂട് ചോറിന്റെ കൂടെ ഈ കറി മാത്രം മതി

ഷാപ്പിലെ മീൻ കറിയെ വെല്ലുന്ന ഉപ്പും മുളകും പുളിയും ചേന്നൊരു സൂപ്പർ കറി. മീൻ കഷ്ണങ്ങൾക്ക് പകരം ഉപയോഗിച്ചിരിക്കുന്നത് ചിക്കൻ കഷ്ണങ്ങളാണ്.

ചേരുവകൾ : 

1. വെളിച്ചെണ്ണ - 2 ടേബിൾ സ്പൂൺ
2. കടുക് - 1/2 ടീസ്പൂൺ
3. ഉലുവ - 1/2 ടീസ്പൂൺ
4. ഇഞ്ചി കൊത്തിയരിഞ്ഞത്‌ - 1 ഇഞ്ച്
5. വെളുത്തുള്ളി കൊത്തിയരിഞ്ഞത്‌ - 5-6 എണ്ണം
6. കറിവേപ്പില - ആശ്യത്തിന്
7. ചെറിയ ഉള്ളി - 5 -6 എണ്ണം
8. കുടമ്പുളി ഉരുക്കിയ നീര് - ആശ്യത്തിന്
9. മഞ്ഞൾപ്പൊടി - 1 ടീസ്പൂൺ
10. മുളകുപൊടി - 3 ടേബിൾസ്പൂൺ
11. മല്ലിപ്പൊടി - 1 ടേബിൾസ്പൂൺ
12. ഉപ്പ് - ആവശ്യത്തിന്
13. ചിക്കൻ എല്ലില്ലാത്ത കഷ്ണങ്ങൾ - 3/4 കിലോഗ്രാം

തയാറാക്കുന്ന വിധം: 

• മീനില്ലാത്ത ഈ മീൻകറിയിൽ മീനിന്  പകരം എല്ലില്ലാത്ത ചിക്കൻ കഷ്ണങ്ങളാണ് ചേർത്തിരിക്കുന്നത് . ആദ്യം ചിക്കൻ ചെറിയ മീൻ കഷ്ണങ്ങൾ പോലെ മുറിച്ച് കഴുകി വയ്ക്കുക. 
• അതിന് ശേഷം ചൂടായ മൺചട്ടിയിലേക്ക് വെളിച്ചെണ്ണ ഒഴിക്കുക. കടുകും ഉലവയും ഇട്ട് പൊട്ടുമ്പോൾ,  ഇഞ്ചി അരിഞ്ഞതും വെളുത്തുള്ളി അരിഞ്ഞതും കുറച്ച് കറിവേപ്പിലയും  ഉള്ളിയും ചേർത്ത് ഇളക്കുക. ഒരു ബ്രൗൺ നിറം ആകുമ്പോൾ മഞ്ഞൾപ്പൊടിയും മുളകുപൊടിയും മല്ലിപ്പൊടിയും ചേർക്കുക .  നന്നായി ഇളക്കി യോജിപ്പിക്കുക. ഈ സമയം  ഉരുക്കിയ കുടമ്പുളി നീര് ആവശ്യത്തിന് ഒഴിക്കുക. ആവശ്യത്തിന് വെള്ളവും ഉപ്പും ചേർക്കാം. 
• ചാറ് നന്നായി തിളയ്ക്കുമ്പോൾ ചിക്കൻ കഷ്ണങ്ങൾ ചേർക്കുക. ഏകദേശം അരമണിക്കൂർ കൊണ്ട് കഷ്ണങ്ങൾ വെന്ത് കിട്ടും. വെളിച്ചെണ്ണയും കറിവേപ്പിലയും ചേർത്ത് വാങ്ങാം. ചൂട് ചോറിന്റെ കൂടെ ഈ കറി ഒഴിച്ച് കഴിച്ചാൽ സൂപ്പർ ടേസ്റ്റാണ്.
  

സ്പെഷൽ ടിപ്പ്  :

കുടമ്പുളി നീര് തയാറാക്കി സൂക്ഷിക്കാൻ ഒരു  പാത്രത്തിൽ കുടം  പുളി എടുത്ത് കഴുകി വയ്ക്കുക. ഇതിലേക്ക് ചെറിയ ചൂട് വെള്ളവും ഉപ്പും ചേർത്ത് നീര് ഇറങ്ങാൻ വയ്ക്കുക. ചൂടാറിയ ശേഷം ഒരു കുപ്പിയിൽ ഒഴിച്ച് ഫ്രിഡ്ജിൽ സൂക്ഷിക്കാം. ഈ നീര് ആവശ്യാനുസരണം കറിയിൽ ചേർക്കാം. നീര് തീരുന്നതിനനുസരിച്ച് വെള്ളം ചേർത്ത് കൊടുത്താൽ വീണ്ടും ഉപയോഗിക്കാം.