പാലക്കാടൻ രുചിപ്പെരുമയിൽ ചിന്താമണി പണിയാരവും ചുവന്ന ചമ്മന്തിയും
Mail This Article
അതിർത്തി പങ്കിടുന്ന തമിഴ്നാടുമായി പാലക്കാടൻ രുചിപ്പെരുമ കൂടിക്കലർന്നിട്ടുണ്ട്. ചിന്താമണി പണിയാരം / അപ്പം അത്തരമൊരു സ്വാദൂറുന്ന പാലക്കാടൻ രുചിയാണ്. മൺസൂൺ മഴത്തണുപ്പിനേയും മഴക്കാല രോഗങ്ങളേയും നേരിടാൻ ധാന്യ പുഷ്ടി നിറഞ്ഞ ഈ പോഷക ചേരുവ ഉപകരിക്കും. ഇതിനോട് കൂട്ടി കഴിക്കാനുള്ള ചുവന്ന തക്കാളി ചമ്മന്തി ആദ്യം തയാറാക്കാം.
ചേരുവകൾ :
- ചെറിയ ഉള്ളി -10-12 എണ്ണം
- വറ്റൽ മുളക് -8 എണ്ണം
- തക്കാളി - 1 എണ്ണം
- കല്ലുപ്പ് -1 1/4 ടീ സ്പൂൺ
- വെളിച്ചെണ്ണ -1 ടേബിൾ സ്പൂൺ
- കടുക് -1 ടീ സ്പൂൺ
- ഉഴുന്ന് പരിപ്പ് -2 ടേബിൾ സ്പൂൺ
- വറ്റൽ മുളക് -2 എണ്ണം
ചെറിയ ഉള്ളി, വറ്റൽ മുളക്, തക്കാളി, കല്ലുപ്പ് എന്നിവ മിക്സിയിൽ ആവശ്യമായ വെള്ളം ചേർത്ത് അരച്ചെടുക്കുക. ചീനച്ചട്ടിയിൽ വെളിച്ചെണ്ണ ചൂടാക്കി കടുക് പൊട്ടിച്ച ശേഷം ഉഴുന്ന് പരിപ്പ് ഇട്ട് നിറം മാറും വരെ 2 മിനിറ്റ് ഇളക്കി കൊടുക്കുക. വറ്റൽ മുളക് 2 എണ്ണം കൂടി ഇതിൽ ചേർത്ത് മൂപ്പിക്കുക. ഈ വറവൽ അരച്ച് വെച്ച ചമ്മന്തിയിൽ ചേർത്തിളക്കി യോജിപ്പിക്കുക.
ഇനി ചിന്താമണി അപ്പം ഉണ്ടാക്കാം.
ചേരുവകൾ :
പൊന്നി അരി, ഇഡ്ഡലി അരി, പച്ചരി, കടല പരിപ്പ്, ഉഴുന്ന് പരിപ്പ്, തുവര പരിപ്പ് (masoor dal ആയാലും മതി ) എന്നിവ 1/2 ഗ്ലാസ് വീതം നന്നായി കഴുകി ഒരു രാത്രി മുഴുവൻ വെള്ളത്തിൽ കുതിർത്തു വയ്ക്കുക.
- വറ്റൽ മുളക് - 3 എണ്ണം
- ഉപ്പ് - 1 1/4 ടീ സ്പൂൺ
- മല്ലിയില -ആവശ്യത്തിന്
- വെളിച്ചെണ്ണ -1 ടേബിൾ സ്പൂൺ
- കടുക് -1 ടീ സ്പൂൺ
- ചെറിയ ഉള്ളി -7-8 എണ്ണം
- പച്ച മുളക് - 4 എണ്ണം
കുതിർത്തെടുത്ത അരിയും, ധാന്യങ്ങളും, വറ്റൽ മുളകും ചേർത്ത് മിക്സിയിൽ അരച്ചെടുക്കുക. അരച്ചെടുത്ത മാവിൽ ഉപ്പിട്ട് നന്നായി ചേർത്തിളക്കണം. ശേഷം മാവ് 6 മണിക്കൂർ പുളിക്കാനായി വയ്ക്കുക.
ഒരു ചീനചട്ടിയിൽ വെളിച്ചെണ്ണ ചൂടാക്കി കടുക് പൊട്ടിച്ചു ചെറിയ ഉള്ളിയും പച്ച മുളകും അരിഞ്ഞു കഷണങ്ങളാക്കി ചട്ടിയിലേക്കിട്ട് വഴറ്റുക. ഈ വറുത്തെടുത്ത ചേരുവ മല്ലിയിലക്കൊപ്പം പുളിപ്പിച്ച മാവിൽ കലർത്തി ഇളക്കുക. ഉണ്ണിയപ്പച്ചട്ടി ചൂടാക്കി 1 ടേബിൾ സ്പൂൺ വീതം എള്ളെണ്ണ ഓരോ കുഴിയിലും ഒഴിച്ച് ചൂടായശേഷം ഓരോ തവി മാവ് ഓരോന്നിലും ഒഴിച്ച് രണ്ട് പുറവും 2 മിനിറ്റ് വീതം ചുട്ടെടുക്കുക.
നാലുമണി പലഹാരമായോ പ്രാതലായോ ഇത് ചുവന്നചമ്മന്തി കൂട്ടി വിളമ്പാം.