ക്രിസ്പി ജിലേബി ചൂടോടെ കഴിക്കാം

ഈ ദീപാവലിക്ക് ജിലേബി വീട്ടിൽ തന്നെ ഉണ്ടാക്കാം. അതിനായി ആദ്യം നമുക്ക് പഞ്ചസാരപ്പാനി എങ്ങനെ തയാറാക്കാമെന്നു നോക്കാം.

പഞ്ചസാര പാനി

2 കപ്പ് പഞ്ചസാരയിൽ ഒരു കപ്പ് വെള്ളവും രണ്ട് ഏലയ്ക്കായ, ഒരു നുള്ള് കുങ്കുമപ്പൂവ്, ഒരു ടീസ്പൂൺ നാരങ്ങാനീര് ഇത്രയും ചേർത്ത് തിളപ്പിക്കുക. 20 സെക്കൻഡ് തിളപ്പിച്ചതിനുശേഷം പഞ്ചസാരപ്പാനി മൂടി മാറ്റി വയ്ക്കുക.

ജിലേബിക്ക് ആവശ്യമുള്ള ചേരുവകൾ:

• മൈദ – ഒരു കപ്പ്
• കോൺഫ്ലവർ – 2 ടേബിൾ സ്പൂൺ
• ബേക്കിങ് സോഡ – 1/4 ടീസ്പൂൺ
• ഓറഞ്ച് ഫുഡ് കളർ – 1/4 ടീസ്പൂൺ
• തൈര് – കാൽകപ്പ്,
• വെള്ളം മുക്കാൽ കപ്പ് (ഏകദേശം).

തയാറാക്കുന്ന വിധം

ഈ ചേരുവകളെല്ലാം യോജിപ്പിച്ച് 15 മിനിറ്റ് മൂടി വയ്ക്കുക. അതിനുശേഷം ചെറിയ നോസിൽ ഉള്ള ഒരു കുപ്പിയിലേക്ക് ഈ മിശ്രിതം ഒഴിക്കുക. മീഡിയം ചൂടുള്ള എണ്ണയിലേക്ക് ഈ മിശ്രിതം ചുറ്റിച്ച് ഒഴിക്കുക. ഓരോ വശവും ക്രിസ്പി ആയതിനുശേഷം ജിലേബി പഞ്ചസാരപ്പാനിയിൽ 20 സെക്കൻഡ് മുക്കി വയ്ക്കുക. അതിനുശേഷം പഞ്ചസാരപ്പാനിയിൽ നിന്ന് ഊറ്റിയെടുത്ത് ചൂടോടെയോ തണുത്തിട്ടോ കഴിക്കാം.