ഇൻസ്റ്റന്റ് റവ ഉപ്പുമാവ്, വളരെ എളുപ്പത്തിൽ പ്രാതൽ

ആരോഗ്യമുള്ള ശരീരത്തിന് പ്രാതൽ  നിർബന്ധം. സമയമില്ലായ്മ ഇനി നിങ്ങളുടെ പ്രാതൽ നഷ്ടപ്പെടുത്തില്ല. റവകൊണ്ടുള്ള ഈ ഉപ്പുമാ കൂട്ട് തിളച്ച വെള്ളത്തിലിട്ട് അടച്ചുവയ്ക്കുകയേ വേണ്ടൂ...

ചേരുവകൾ

• നെയ്യ് അല്ലെങ്കിൽ വെളിച്ചെണ്ണ - 1 ടേബിൾ സ്പൂൺ
• കടുക്, കടലപ്പരിപ്പ്, ഉഴുന്ന് പരിപ്പ്, അണ്ടിപ്പരിപ്പ്  - 1 ടേബിൾ സ്പൂൺ വീതം
• ഇഞ്ചി (അരിഞ്ഞത് ) - 1 ടീ സ്പൂൺ
• കറിവേപ്പില - ആവശ്യത്തിന്
• റവ - 350 ഗ്രാം
• ഉപ്പ് - 1 ടീ സ്പൂൺ

തയാറാക്കുന്ന വിധം

ചട്ടി ചൂടാക്കി നെയ്യ് തിളപ്പിച്ച്‌ അതിലേക്ക് കടുക് ഇട്ട് പൊട്ടിക്കുക. ശേഷം കടല, ഉഴുന്ന് പരിപ്പുകളും ഇഞ്ചിയും പച്ച മുളകും ഇട്ട് വഴറ്റുക. ഇതിലേക്ക് അണ്ടിപരിപ്പ് ചേർത്ത് ബ്രൗൺ നിറമാകുംവരെ വറുക്കുക. കറിവേപ്പിലകൂടി ചേർക്കുക. പാകമായ ഈ ചേരുവയിലേക്ക് റവ ചേർത്തിളക്കി ഇളം ബ്രൗൺ നിറം ആകും വരെ ചെറു തീയിൽ  വറുക്കുക. ഉപ്പും ചേർത്ത് വാങ്ങി വയ്ക്കുക. വായു കടക്കാത്ത സ്ഫടിക പാത്രത്തിൽ 6 മാസം വരെ ഇത് കേടാകില്ല.

ആവശ്യമുള്ള നേരത്ത് ഈ റവക്കൂട്ട് ഉപയോഗിക്കാം. 1 കപ്പ് റവക്കൂട്ടിൽ 1 1/2 കപ്പ് തിളപ്പിച്ച വെള്ളം ചേർത്ത് 8 മിനിറ്റ് വേവാൻ അടച്ചു വയ്ക്കുക. 10 മിനിറ്റിനു ശേഷം ഈ പ്രാതൽ സ്വാദോടെ വിളമ്പാം.