മനോഹരം കഴിച്ചിട്ടുണ്ടോ? പേരുപോലെ രുചിയും ഗുണവും

മനോഹരം കഴിച്ചിട്ടുണ്ടോ?പേരുപോലെതന്നെ രുചിയും ഗുണവും ഏറെയുള്ള ഒരു മധുര പലഹാരമാണ് മനോഹരം. തയാറാക്കാനും വളരെ എളുപ്പമാണ്. ഏറെനാൾ ചീത്തയാകാതെ സൂക്ഷിച്ചുവെക്കാനും പറ്റും.

ചേരുവകൾ

• ചെറുപയർ പരിപ്പ് - അര കപ്പ്
• പച്ചരി - കാൽ കപ്പ്
• തേങ്ങാക്കൊത്ത് - അര കപ്പ്
• ശർക്കര പൊടിച്ചത് - അര കപ്പ്
• വെള്ളം - കാൽ കപ്പ് 
• ഏലയ്ക്കാപ്പൊടി - അരടീസ്പൂൺ
• ചുക്കുപൊടി - അര ടീസ്പൂൺ
• പഞ്ചസാര - കാൽ കപ്പ്

തയാറാക്കുന്ന വിധം

• പയറുപരിപ്പും പച്ചരിയും നന്നായി കഴുകി 3 മണിക്കൂർ വെള്ളത്തിൽ കുതിർത്ത് വയ്ക്കുക. വെള്ളം ചേർക്കാതെ നല്ല മയത്തിൽ അരച്ചെടുക്കണം.  ഇഡ്ഡലി മാവിനേക്കാൾ അല്പം കൂടി കട്ടി ഉണ്ടാവണം. ആവശ്യമെങ്കിൽ അല്പം വെള്ളം ചേർത്തു കൊടുക്കാം.
• ഇനി ചുവടുകട്ടിയുള്ള ഒരു പാത്രത്തിൽ എണ്ണ ചൂടാക്കി ഒരു കണ്ണാപ്പയിലൂടെ (സുഷിരങ്ങൾ ഉള്ള തവി) മാവ് എണ്ണയിലേക്ക് തുള്ളിതുള്ളിയായി ഒഴിച്ചു കൊടുക്കണം.(ലഡുവിന് ബൂന്തി വറുക്കുന്നത് പോലെ)
• ചെറിയ തീയിൽ സ്വർണ്ണ നിറമാകുന്നതുവരെ നന്നായി വറുത്ത് കോരി മാറ്റുക. അരച്ചുവച്ച മാവ് തീരുന്നതുവരെ ഇങ്ങനെ ബൂന്തി  വറുത്തെടുക്കണം.
• ഇതേ എണ്ണയിൽ തേങ്ങാക്കൊത്ത് ഇളം ബ്രൗൺ നിറത്തിൽ വറുത്ത് കോരുക.
• മറ്റൊരു പാത്രത്തിൽ ശർക്കര പൊടിച്ചതും ഏലയ്ക്കാപ്പൊടിയും ചുക്കുപൊടിയും വെള്ളവും ചേർത്ത് തിളപ്പിക്കുക. ശർക്കരയിൽ അഴുക്ക് ഉണ്ടെങ്കിൽ അരിച്ചെടുക്കണം.
• ഇത് ഒരു നൂൽ പരുവത്തിലുള്ള പാനി ആകുമ്പോൾ വറുത്തുവച്ചിരിക്കുന്ന ബൂന്തിയും തേങ്ങാക്കൊത്തും ഇട്ട് യോജിപ്പിക്കണം. 
• തീ ഓഫ് ചെയ്ത് ചൂടിൽ നിന്നും മാറ്റി നന്നായി ഇളക്കി കൊടുക്കുക. 10 മിനിറ്റ് കഴിയുമ്പോൾ ശർക്കരപ്പാനി മുഴുവൻ ബൂന്തിയിലേക്ക് പിടിക്കും ഇപ്പോൾ അല്പം പഞ്ചസാര വിതറി വീണ്ടും ഇളക്കുക.
• രുചികരമായ മനോഹരം തയാർ.
• ചൂടാറുമ്പോൾ വായു കടക്കാത്ത പാത്രത്തിലാക്കി അടച്ച് ഒരു മാസം വരെ സൂക്ഷിച്ചു വച്ച് ഉപയോഗിക്കാം.