ബട്ടറും ക്രീമും ഇല്ലാതെ തന്നെ രുചികരമായ ബട്ടർ ചിക്കൻ
Mail This Article
ബട്ടറും ക്രീമും ചേർക്കാതെ ബട്ടർ ചിക്കൻ രുചിയിൽ തയാറാക്കുന്നത് എങ്ങനെയെന്നു നോക്കാം.
ചേരുവകൾ
- ചിക്കൻ - 1 കിലോഗ്രാം
- സവാള - 4
- തക്കാളി - 4
- അണ്ടിപരിപ്പ് - 10 എണ്ണം
- ഇഞ്ചി വെളുത്തുള്ളി പേസ്റ്റ്
- ജീരകം
- കാശ്മീരി മുളകുപൊടി
- മഞ്ഞൾപ്പൊടി
- മല്ലിപ്പൊടി
- ഗരംമസാല
- കുരുമുളകുപൊടി
- നാരങ്ങ - 1
തയാറാക്കുന്ന വിധം
ആദ്യം 1/2 ടീസ്പൂൺ മഞ്ഞൾപ്പൊടി, 1 ടീസ്പൂൺ കുരുമുളകുപൊടി, 2 ടീസ്പൂൺ മല്ലിപ്പൊടി, 1 ടീസ്പൂൺ കാശ്മീരി മുളകുപൊടി, 1 ടീസ്പൂൺ ഗരംമസാല, 2 ടീസ്പൂൺ ഇഞ്ചി വെളുത്തുള്ളി പേസ്റ്റ്, നാരങ്ങാനീര്, ഉപ്പ് എന്നിവ ചിക്കനിൽ ചേർത്തു നന്നായി ഇളക്കി യോജിപ്പിച്ചു 15 മിനിറ്റ് മാറ്റി വയ്ക്കുക. 15 മിനിറ്റിനു ശേഷം ചിക്കൻ വറുത്തു കോരി എടുക്കുക.
ഒരു ചീനച്ചട്ടിയിൽ 4 ടേബിൾസ്പൂൺ എണ്ണയും 2 ടേബിൾസ്പൂൺ നെയ്യും ഒഴിക്കുക. എണ്ണ ചൂടായി കഴിഞ്ഞു 1 ടീസ്പൂൺ ജീരകവും സവാളയും 1 ടേബിൾസ്പൂൺ ഇഞ്ചി വെളുത്തുള്ളി പേസ്റ്റും ചേർത്തു നന്നായി വഴറ്റി എടുക്കുക. അതിനുശേഷം തക്കാളിയും അണ്ടിപരിപ്പും കൂടി ചേർത്ത് അതു വേവിച്ചെടുക്കുക. അതിലേക്ക് 1/4 ടീസ്പൂൺ മഞ്ഞൾപ്പൊടി 1 ടീസ്പൂൺ കാശ്മീരി മുളകുപൊടി 1 ടീസ്പൂൺ മല്ലിപ്പൊടി 1/2 ടീസ്പൂൺ ഗരംമസാല എന്നിവ കൂടി ചേർത്തു വഴറ്റുക. ഇത് ചൂടാറി കഴിഞ്ഞു നല്ലതു പോലെ ഒന്നു അരച്ചെടുക്കുക.
ചിക്കൻ വറുത്ത എണ്ണയിലേക്ക് 1 ടീസ്പൂൺ നെയ്യും 1/2 ടീസ്പൂൺ കാശ്മീരി മുളകുപൊടിയും ചേർത്തതിനുശേഷം അരച്ചു വച്ച പേസ്റ്റ് ചേർക്കുക. ആവശ്യത്തിന് ഉപ്പും വെള്ളവും 1/2 ടീസ്പൂൺ ഗരംമസാലയും ചേർത്തുകൊടുത്തതിനു ശേഷം വറത്തു വച്ച ചിക്കൻ ഇട്ടു കൊടുക്കുക. 5 മിനിറ്റ് ചൂടാക്കിയിട്ടു കുറച്ചു മല്ലിയില കൂടി വിതറുക. ബട്ടർ ചിക്കൻ തയാർ.
English Summary : Butter Chicken Without Cream and Butter