ഈ സാൻവിച്ച് ഒരെണ്ണം കഴിച്ചാൽ വയറു നിറയും

പച്ചക്കറി കഴിക്കാത്ത കൊച്ചു കുട്ടികൾക്ക് ഈ രീതിയിൽ സാൻവിച്ച് തയാറാക്കി കൊടുത്തു നോക്കൂ.

ചേരുവകൾ:

• ബ്രഡ് – 8 കഷ്ണം
• 2 മുട്ട + 2 മുട്ടയുടെ വെള്ള
• കാബേജ് – 2 കപ്പ് കനം കുറച്ച് അരിഞ്ഞത് 
• കാരറ്റ് – 3/4 കപ്പ് കനം കുറച്ച് അറിഞ്ഞത് 
• കുരുമുളക് പൊടി  – 1/2 ടീസ്പൂൺ 
• സവാള – 1
• ഉപ്പ് – ആവശ്യത്തിന് 
• മയോണൈസ് – 1 ടീസ്പൂൺ 
• ടൊമാറ്റോ സോസ് – 1 ടീസ്പൂൺ

തയാറാക്കുന്ന വിധം:

1.  ഒരു ബൗളിൽ കാബേജ്, കാരറ്റ്, സവാള, കുരുമുളകു പൊടി, ആവശ്യത്തിന് ഉപ്പ് എന്നിവ ചേർത്ത് നന്നായി യോജിപ്പിച്ച് എടുക്കണം.

2.  രണ്ട് മുട്ടയും 2 മുട്ടയുടെ വെള്ളയും നന്നായിട്ട് അടിച്ച് കാബേജിന്റെ കൂടെ മിക്സ് ചെയ്യണം. ഇതാണ് സാൻവിച്ച്   ഫില്ലിങ്.

3. ഒരു ഫ്രൈയിങ് പാനിൽ ബ്രഡ്  ചൂടാക്കി എടുക്കണം.

4. ബ്രെഡ് എല്ലാം ചൂടാക്കിമാറ്റിയതിനു ശേഷം ആ പാനിലേക്ക് കുറച്ച് എണ്ണ ഒഴിച്ച് കൊടുക്കണം. ഫില്ലിങിന്റെ പകുതി പാനിലേക്ക്  ഇട്ട് ഒരു തവി ഉപയോഗിച്ചു ഫില്ലിങ് ഒരു ദീർഘചതുരാകൃതിയിലാക്കി എടുക്കണം. 3 മിനിറ്റ് വേവിച്ചതിന് ശേഷം രണ്ട് കഷ്ണങ്ങളായി മുറിക്കണം. തിരിച്ചിട്ട് 3 മിനിറ്റ് വീണ്ടും വേവിക്കണം.

5. കുക്ക് ചെയ്ത ഫില്ലിങ് ബ്രഡിലേക്ക് വച്ച് മയോണൈസും ടൊമാറ്റോ സോസും സ്‌പ്രെഡ്‌ ചെയ്ത് വിളമ്പാം.