പ്രഭാത ഭക്ഷണത്തിന് റവ കൊണ്ടുള്ള ഇറച്ചിപ്പുട്ട്

രുചികരമായ റവ പുട്ട്, ഇറച്ചി മസാല നിറച്ച് തയാറാക്കാം.

ചേരുവകൾ 

• എല്ലില്ലാത്ത ചിക്കൻ  - 250 ഗ്രാം     
• കുരുമുളകുപൊടി  - 1/4 ടീസ്പൂൺ
• മുളകുപൊടി - 1/4 ടീസ്പൂൺ
• മഞ്ഞൾപ്പൊടി   - 1/4 ടീസ്പൂൺ
• ഉള്ളി   - 300 ഗ്രാം        
• വെളുത്തുള്ളി -  5 ഗ്രാം
• ഇഞ്ചി - 2 ടേബിൾസ്പൂൺ
• പച്ചമുളക് - 2
• കറിവേപ്പില
• കുരുമുളകുപൊടി  - 1/2 ടീസ്പൂൺ
• ഗരം മസാലപ്പൊടി -  1/2 ടീസ്പൂൺ
• മല്ലിയില    - 1 ടേബിൾസ്പൂൺ
• റവ   - 1 കപ്പ്
• വെള്ളം   - 1/2 കപ്പ്
• നാളികേരം – 1/3 കപ്പ് +2 ടേബിൾസ്പൂൺ

തയാറാക്കുന്ന വിധം

• ഇറച്ചിയിൽ മുളകുപൊടിയും മഞ്ഞൾപ്പൊടിയും കുരുമുളകുപൊടിയും ഉപ്പും ചേർത്ത് മാരിനേറ്റ് ചെയ്തു വയ്ക്കുക. ഇത് കുറച്ചു വെള്ളമൊഴിച്ചു വേവിച്ചു വെള്ളം വറ്റിച്ചെടുത്തു ഗ്രൈൻഡറിൽ പൊടിച്ചെടുക്കുക .
• പാനിൽ എണ്ണയൊഴിച്ചു ഉള്ളി, ഇഞ്ചി, വെളുത്തുള്ളി, പച്ചമുളക്, കറിവേപ്പില എന്നിവ ചേർത്ത് വഴറ്റി അതിൽ ഇറച്ചി പൊടിച്ചത് ചേർത്ത് ആവി വന്നു കഴിഞ്ഞു കുരുമുളകുപൊടിയും ഗരം മസാലപ്പൊടിയും ചേർത്ത് വഴറ്റി മല്ലിയിലയിട്ടു ഇറച്ചി ഒത്തിരി മൂക്കാതെ എടുക്കാം.

• ഒരു ഫ്രൈയിങ് പാനിൽ റവ വറുത്തെടുക്കുക. അതിൽ ഉപ്പും ചെറിയ ചൂടുള്ള വെള്ളമൊഴിച്ചു 10 മിനിറ്റ് അടച്ചു വയ്ക്കുക .പിന്നീട് തേങ്ങാ കൂടെ ചേർത്ത് ഗ്രൈൻഡറിൽ പൊടിച്ചെടുക്കുക
• പുട്ടുകുറ്റിയിൽ ആദ്യം തേങ്ങ, ചിക്കൻ മസാല, റവ എന്ന രീതിയിൽ നിറച്ചു, അവസാനം തേങ്ങയും ചേർത്ത് പുട്ട് 5 മിനിറ്റ് ആവി കയറ്റിയെടുക്കുക.

English Summary : Soft Rava Puttu Chicken Masala.