പോഷക സമ്പുഷ്ടമായ ഏത്തപ്പഴം, കുട്ടികളുടെ ഭക്ഷണത്തിൽ ദിവസേന ഉൾപ്പെടുത്താം

നേന്ത്രപ്പഴം പല രൂപത്തിൽ  ദിവസവും കുട്ടികൾക്ക് കൊടുക്കാം. വ്യത്യസ്തമായ ചില രുചിക്കൂട്ടുകൾ ഇതാ.

∙ഏത്തപ്പഴവും തണുത്ത പാലും ചേർത്തടിച്ച് സ്മൂത്തി തയാറാക്കാം. ബട്ടർ ഫ്രൂട്ട്, ചോക്കലേറ്റ്, ആപ്പിൾ എന്നിവയിലേതെങ്കിലും ചേർക്കാം.

∙നന്നായി പഴുത്ത ഏത്തപ്പഴം നെയ്യിൽ വഴറ്റിയെടുക്കാം. 

∙ഏത്തപ്പഴം പുഴുങ്ങി ഉടച്ച്, അവൽ ശർക്കര കൂട്ട് ചേർത്ത് വറുത്താൽ ഉന്നക്കായ ഉണ്ടാക്കാം. 

∙ഏത്തപ്പഴം നുറുക്കിയതും ശർക്കരയും തേങ്ങാപ്പാലും ചേർത്ത് വഴറ്റിയെടുത്താൽ ഏത്തപ്പഴ പ്രഥമനായി. കേക്ക് മിശ്രിതത്തിൽ ഏത്തപ്പഴം അടിച്ചത് ചേർത്ത് ബനാനാ കേക്ക് തയാറാക്കാം.

∙കൊഴുക്കട്ട, അട എന്നിവയുടെ കൂട്ടിലും ഏത്തപ്പഴം ചേർക്കാം

ഏത്തപ്പഴം കൊണ്ട് മലബാർ പലഹാരം ഉന്നക്കായ വിഡിയോ കാണാം

ലിബിസജീവ്

ചേരുവകൾ

• ഏത്തപ്പഴം - 4 എണ്ണം (ഒരുപാട് പഴുക്കാത്തത് )
• തേങ്ങ - 1 കപ്പ്‌
• കശുവണ്ടി - 2 ടേബിൾസ്പൂൺ
• ഉണക്കമുന്തിരി - 2 ടേബിൾസ്പൂൺ
• നെയ്യ് - 2 ടേബിൾസ്പൂൺ
• പഞ്ചസാര - 2 ടേബിൾസ്പൂൺ
• ഏലക്ക പൊടി - 1 ടീസ്പൂൺ
• സൺഫ്ലവർ ഓയിൽ - വറുക്കാൻ ആവശ്യത്തിന്

തയാറാക്കുന്ന വിധം

• ആദ്യം ഏത്തപ്പഴം പൊളിച്ചു അതിന്റെ ഉള്ളിലെ നാരു കളഞ്ഞു ആവിയിൽ വേവിച്ചെടുക്കുക.
• അതിനു ശേഷം അത് നന്നായി തരി ഇല്ലാതെ കുഴച്ചെടുക്കുക.
• അതിനു ശേഷം ഫില്ലിങ് റെഡിയാക്കുക.

ഫില്ലിങ്

ഒരു ഫ്രൈയിങ് പാൻ വച്ചു നെയ്യ് ഒഴിച്ച് കശുവണ്ടി, ഉണക്കമുന്തിരി എന്നിവ വറക്കുക, അതിലോട്ടു തേങ്ങ ചേർത്ത് ഒന്ന് ചൂടാക്കുക, പഞ്ചസാരയും ഏലക്ക പൊടിയും ചേർത്ത് ഇളക്കി എടുക്കുക.

ഫില്ലിങ് റെഡി

• ഏത്തപ്പഴം കൂട്ടിൽ നിന്ന് ഓരോ നാരങ്ങാ വലുപ്പത്തിൽ ബോൾ എടുത്തു കൈയിൽ നെയ്യോ വെള്ളമോ തടവി പരത്തുക. അതിലേക്കു ഫില്ലിങ് വച്ചു അടയ്ക്കുക.
• കയ്യിൽ വച്ച്  ഉന്നക്കായ ഷേപ്പിൽ എടുക്കുക.
• 30 മിനിറ്റ് ഫ്രിജിൽ വച്ചതിനു ശേഷം വറുത്തെടുക്കുക.

English Summary : Unnakkaya, Tasty Banana Recipe.