മാൽപുവ നവരാത്രി ദിവസങ്ങളിൽ  തയാറാക്കുന്ന ഒരു മധുരപലഹാരം

നവരാത്രി ദിവസങ്ങളിൽ  തയാറാക്കുന്ന ഒരു മധുരപലഹാരം ആണ് മാൽപുവ . പാൻ കേക്ക് തയാറാക്കി പഞ്ചസാരപ്പാനിയിൽ ഇട്ടാണ് ഈ വിഭവം ഒരുക്കുന്നത്. ഏറെ രുചികരമായ മാൽപുവ എളുപ്പത്തിൽ തയാറാക്കാം.

ചേരുവകൾ

• മൈദ - ഒരു കപ്പ്
• റവ - അരക്കപ്പ്
• പെരുംജീരകം - അര ടീസ്പൂൺ
• ഏലക്ക - അഞ്ച്
• പാൽപ്പൊടി - രണ്ട് ടേബിൾ സ്പൂൺ
• പാൽ - ഒരു കപ്പു മുതൽ ഒന്നര കപ്പു വരെ
• പഞ്ചസാര - രണ്ട് ടേബിൾ സ്പൂൺ
• നെയ്യ് - 4 ടേബിൾസ്പൂൺ

പഞ്ചസാര  പാനിക്ക് ആവശ്യമുള്ള ചേരുവകൾ

• പഞ്ചസാര - ഒരു കപ്പ്
• വെള്ളം - മുക്കാൽ കപ്പ്
• ഏലക്ക ചതച്ചത്- 5
• കുങ്കുമപ്പൂവ് - കാൽടീസ്പൂൺ

തയാറാക്കുന്ന വിധം

• മൈദയും പെരുംജീരകവും ഏലക്കയും ചേർത്ത് മിക്സിയിൽ പൊടിച്ചെടുക്കുക.
• ഇതിലേക്ക് റവയും പഞ്ചസാരയും പാൽപ്പൊടിയും ചേർത്ത് ഇളക്കി കുറേശ്ശേ പാൽ ഒഴിച്ചു കൊടുത്തു ഇഡ്ഡലി മാവിന്റെ പരുവത്തിൽ കലക്കിയെടുക്കുക.
• ഈ മാവ് രണ്ടുമണിക്കൂർ മാറ്റിവയ്ക്കണം. 

• രണ്ടു മണിക്കൂർ കഴിയുമ്പോൾ മാവിന് കട്ടി കൂടുതലാണെങ്കിൽ അല്പം പാൽ കൂടി ചേർത്ത് ഇളക്കുക.
• അടുത്തതായി പഞ്ചസാരപ്പാനി തയാറാക്കാം. പഞ്ചസാരയും വെള്ളവും ഏലക്ക ചതച്ചതും കുങ്കുമപ്പൂവും നന്നായി തിളപ്പിക്കുക. ഒരു നൂൽ പരുവത്തിന് തൊട്ടു മുൻപ് തീ ഓഫ് ചെയ്യണം.

• ഒരു പരന്ന പാനിൽ  നെയ്യ് ചൂടാക്കി ചെറിയ ദോശ  പോലെ ഓരോ തവി മാവ് കോരി ഒഴിക്കുക. ഒരു വശം മൂത്ത് ഗോൾഡൻ ബ്രൗൺ നിറമാകുമ്പോൾ  തിരിച്ചു ഇടുക. 
• രണ്ടുവശവും വെന്തു കഴിയുമ്പോൾ ചൂടോടെ പഞ്ചസാര പാനിയിലേക്ക് ഇടുക. ഒരു മിനിറ്റ് പഞ്ചസാരപ്പാനിയിൽ മുക്കി വച്ചതിനുശേഷം ശേഷം എടുത്ത് മറ്റൊരു പാത്രത്തിലേക്ക് മാറ്റാം.
• ഇങ്ങനെ മാവ് തീരുന്നതുവരെ ചുട്ടെടുക്കാം.

• രുചികരമായ മാൽപുവ തയ്യാർ. ചെറുതായി അരിഞ്ഞ നട്സ് കൊണ്ട് അലങ്കരിക്കാം.

(മാൽപുവ പഞ്ചസാരപ്പാനിയിൽ ഇടുമ്പോൾ പഞ്ചസാര പാനിക്ക് ചെറിയ ചൂട് ഉണ്ടാവണം. എങ്കിൽ മാത്രമേ ഷുഗർ സിറപ്പ് നന്നായി പിടിക്കുകയുള്ളൂ.)

English Summary : Malpua is a traditional North Indian sweet of soft and fluffy pancakes coated with sugar syrup.