ഉള്ളി വഴറ്റി സമയം കളയണ്ട, കുക്കറിൽ നിമിഷനേരം കൊണ്ടൊരുഗ്രന് വെജിറ്റബിള് കുറുമ!
Mail This Article
ലളിതമായ മസാലക്കൂട്ടുമായി ഒരു കിടിലൻ വെജിറ്റബിള് കുറുമ വളരെ എളുപ്പത്തില് കുക്കറിൽ തയാറാക്കാം. അപ്പത്തിനും പൊറോട്ടയ്ക്കും ചപ്പാത്തിയ്ക്കും എല്ലാം പെര്ഫെക്ട് കോമ്പിനേഷനാണ് ഈ കറി.
ചേരുവകൾ:
- കാരറ്റ്-1
- ഉരുളക്കിഴങ്ങ്-1
- ഗ്രീൻപീസ് - 1/4 കപ്പ്
- തക്കാളി - 1
- സവാള - 1/2
- പച്ചമുളക് - 2-4
- ഇഞ്ചി - 1 ചെറിയ കഷ്ണം
- കറിവേപ്പില - കുറച്ച്
- ഏലക്ക - 2
- ഗ്രാമ്പൂ - 2
- കറുവപ്പട്ട - 1 ചെറിയ കഷണം
- മല്ലിപ്പൊടി - 1/2 ടീസ്പൂൺ
- മഞ്ഞൾപ്പൊടി - 1/2 ടീസ്പൂൺ
- പെരുംജീരകം - 1/2 ടീസ്പൂൺ
- തേങ്ങ ചിരകിയത് - 1/4 കപ്പ്
- കശുവണ്ടി - 6-8
- വെള്ളം - 2 കപ്പ്
- ഉപ്പ് - പാകത്തിന്
തയാറാക്കുന്ന വിധം
• ഗ്രീൻപീസ് 7-8 മണിക്കൂര് കുതിര്ത്തെടുക്കുക. കാരറ്റും ഉരുളക്കിഴങ്ങും തക്കാളിയും സവാളയും പച്ചമുളകും അരിഞ്ഞെടുക്കുക. ഇഞ്ചി ചതച്ചെടുക്കാം.
• കശുവണ്ടി 1/4 കപ്പ് ചെറിയ ചൂടുവെള്ളമൊഴിച്ച് കുതിര്ത്ത് വയ്ക്കുക.
• ഗ്രീൻപീസ് പ്രഷർ കുക്കറില് മുങ്ങിക്കിടക്കാന് പാകത്തിന് വെള്ളമൊഴിച്ച് ഒരു വിസില് വരെ വേവിക്കുക. അതിനുശേഷം കുക്കര് തുറന്ന് ബാക്കി പച്ചക്കറികളും പച്ചമുളകും ഇഞ്ചിയും കറിവേപ്പിലയും ഏലക്കയും ഗ്രാമ്പൂവും കറുവപ്പട്ടയും മല്ലിപ്പൊടിയും മഞ്ഞൾപ്പൊടിയും ഉപ്പും 3/4 കപ്പ് വെള്ളവും ചേര്ത്ത് ഒരു വിസില് വരെ വേവിക്കുക.
• തേങ്ങ ചിരകിയത് പെരുംജീരകവും കുതിര്ത്തു വച്ച കശുവണ്ടിയും ചേര്ത്ത് നല്ല മയത്തില് അരച്ചെടുക്കുക.
• ആവി മുഴുവന് പോയ ശേഷം കുക്കര് തുറന്ന് അരപ്പ് ചേര്ത്തിളക്കി 5 മിനിറ്റ് അടച്ചു വച്ച് വേവിക്കുക.
• ഇനി കടുക് വറുത്ത് ചേര്ത്താല് സൂപ്പര് രുചിയില് വെജിറ്റബിള് കുറുമ റെഡി!
English Summary : Vegetable Kuruma Recipe.