ബിരിയാണി എന്ന് കേൾക്കുമ്പോൾ തന്നെ ചിക്കൻ ബിരിയാണിയും മട്ടൻ ബിരിയാണിയും ആണ് മനസ്സിലേക്കു വരിക. ചിക്കനും മട്ടനും ഒന്നുമില്ലെങ്കിലും തക്കാളി വച്ചും അതീവ രുചികരമായ ബിരിയാണി തയാറാക്കാം. ഇഷ്ടമുള്ള ഏത് കറി കൂട്ടി വേണമെങ്കിലും കഴിക്കാം.
ചേരുവകൾ
- തക്കാളി - 3 വലുത്
- ബസ്മതി അരി - ഒരു കപ്പ്
- ഏലക്ക - 5
- ഗ്രാമ്പൂ - 3
- വഴനയില - 1
- കറുവപ്പട്ട - ഒരു ചെറിയ കഷണം
- സവാള - 2
- പച്ചമുളക് - 5
- ഇഞ്ചി പേസ്റ്റ് - ഒരു ടീസ്പൂൺ
- വെളുത്തുള്ളി പേസ്റ്റ് - ഒരു ടീസ്പൂൺ
- മഞ്ഞൾപ്പൊടി - കാൽ ടീസ്പൂൺ
- കാശ്മീരി മുളകുപൊടി - ഒരു ടീസ്പൂൺ
- മല്ലിപ്പൊടി - ഒരു ടീസ്പൂൺ
- പെരുംജീരകം പൊടിച്ചത് - ഒരു ടീസ്പൂൺ
- കാരറ്റ് - 1
- ബീൻസ് - 10
- മല്ലിയിലയും പുതിനയിലയും അരിഞ്ഞത് - ഒരു പിടി
- ഉപ്പ് - ആവശ്യത്തിന്
- നെയ്യ് - 4 ടേബിൾ സ്പൂൺ
- അണ്ടിപ്പരിപ്പ് - കാൽകപ്പ്
- ഉണക്കമുന്തിരി - കാൽ കപ്പ്
- ഉപ്പ് - ആവശ്യത്തിന്
തയാറാക്കുന്ന വിധം
- രണ്ട് വലിയ തക്കാളി തിളച്ച വെള്ളത്തിൽ ഒരു മിനിറ്റ് മുക്കി വയ്ക്കുക. തൊലി കളഞ്ഞതിനുശേഷം മിക്സിയിൽ നല്ല മയത്തിൽ അരച്ചെടുക്കുക.
- ബസ്മതി അരി 30 മിനിറ്റ് വെള്ളത്തിൽ കുതിർത്തു വയ്ക്കുക.
- ചുവട് കട്ടിയുള്ള ഒരു പാത്രത്തിൽ മൂന്ന് ടേബിൾസ്പൂൺ നെയ്യ് ചൂടാക്കി ഏലയ്ക്ക, ഗ്രാമ്പൂ, കറുവപ്പട്ട, വഴനയില ഇവ മൂപ്പിക്കുക.
- ചെറുതായി അരിഞ്ഞ സവാളയും പച്ചമുളകും ചേർത്തു വഴറ്റുക.
- സവാള ഇളം ബ്രൗൺ നിറമാകുമ്പോൾ ഇഞ്ചി പേസ്റ്റും വെളുത്തുള്ളി പേസ്റ്റും ചേർക്കുക.
- പച്ചമണം മാറുമ്പോൾ മഞ്ഞൾപ്പൊടി, മുളകുപൊടി, മല്ലിപ്പൊടി, പെരുംജീരകം പൊടിച്ചത് ഇവ ചേർക്കുക.
- തക്കാളി അരച്ചത് ചേർത്ത് വെള്ളം വറ്റി എണ്ണ തെളിയുന്നതുവരെ വരട്ടുക.
- രണ്ട് കപ്പ് വെള്ളം, കാരറ്റ്, ബീൻസ്, മല്ലിയിലയും പുതിനയിലയും അരിഞ്ഞത്, ആവശ്യത്തിന് ഉപ്പ്, ഒരു തക്കാളി അരിഞ്ഞത് ഇവ ചേർക്കുക.
- നന്നായി വെട്ടി തിളയ്ക്കുമ്പോൾ ബസ്മതി അരി ഇടുക.
- വെള്ളം വറ്റി അരിയുടെ അതേ ലെവലിൽ എത്തുമ്പോൾ അടച്ചുവച്ചു ചെറിയ തീയിൽ എട്ടു മുതൽ 10 മിനിറ്റ് വരെ വേവിക്കുക.
- ഒരു ടേബിൾ സ്പൂൺ നെയ്യ് ചൂടാക്കി അണ്ടിപ്പരിപ്പും ഉണക്കമുന്തിരിയും വറുത്ത് ബിരിയാണിയിൽ ചേർക്കാം.
- അൽപം മല്ലിയിലയും പുതിനയിലയും കൂടി വിതറാം.
Content Summary : Tomato biriyani recipe by Ganga.
