ഇങ്ങനെയാണ് പുതിന ചട്ണി ഉണ്ടാക്കേണ്ടത്

ആരോഗ്യഗുണങ്ങൾ ഏറെയുള്ളയൊന്നാണ് പുതിന. പുതിന രക്തത്തിലെ വിഷവസ്തുക്കൾ നീക്കി രക്തം ശുദ്ധിയാക്കുന്നു. ദഹനശക്തി വർധിപ്പിക്കുന്നു. പുതിനയിൽ പ്രോട്ടീനും കൊഴുപ്പും നാരുകളും കാത്സ്യവും ഫോസ്ഫറസും വൈറ്റമിൻ സി, എ തുടങ്ങിയവയും ധാരാളമുണ്ട്. പുതിന കൊണ്ട് രുചികരമായ ചട്ണി തയാറാക്കാം. ദോശക്കും ഇഡ്‍ഡലിക്കും സൂപ്പറാണ്. 

ചേരുവകൾ 

തേങ്ങ– 1 മുറി ചിരവിയത്

പുതിന– 3 കപ്പ് 

മല്ലിയില– പുതിനയുടെ മൂന്നിലൊന്ന്

കറിവേപ്പില– 1 തണ്ട്

ഇഞ്ചി– 1 ചെറിയ കഷ്ണം

പച്ചമുളക്– 2 എണ്ണം

ഉഴുന്ന് പരിപ്പ് - 2 ടേബിൾസ്പൂൺ 

വെളിച്ചെണ്ണ - 2 ടേബിൾസ്പൂൺ 

തയാറാക്കുന്ന വിധം 

തേങ്ങ ഒഴികെ ബാക്കി എല്ലാ ചേരുവകളും കൂടെ വെളിച്ചെണ്ണയിൽ വഴറ്റി, ചൂടാറുമ്പോൾ തേങ്ങയും, ആവശ്യത്തിനു ഉപ്പും  ചേർത്തു അരച്ചെടുക്കാം. ഇതിലേക്ക് കടുക് താളിച്ചു ഇട്ടാൽ പുതിന ചട്ണി റെഡി.