പ്രണയദിനമല്ലേ... ഇച്ചിരി കാപ്പിയെടുക്കട്ടെ?
Mail This Article
വാലന്റൈൻ ആരായാലും അവരെ പാട്ടിലാക്കാൻ ഏറ്റവും നല്ല വഴി ഭക്ഷണം തന്നെ!. വെറുതെ ഭക്ഷണം പോരാ...സ്നേഹം ജനിപ്പിക്കുന്നതു ലളിതവുമായ മൂന്ന് രുചിക്കൂട്ടുകളാണ് ഇവിടെ ഒരുക്കിയിരിക്കുന്നത്.
സ്പാനിഷ് ഓംലറ്റ് (സ്പാനിഷിൽ എങ്ങനെയാ ഐ ലവ് യൂ ന്ന് പറയുന്നതെന്നറിണോ? ടി.. അമോ എന്നു പറഞ്ഞാൽ മതി!)
- മുട്ട –2
- സവോള – 1
- ഉരുളക്കിഴങ്ങ് – 1
- കുരുമുളകു പൊടി – 1 ടീസ്പൂൺ
- വറ്റൽമുളക് പൊടിച്ചത് – 1 ടീസ്പൂൺ
- ചീസ്,പഞ്ചസാര, ഉപ്പ് – ആവശ്യത്തിന്
തയാറാക്കുന്ന വിധം
∙ ഒരു ചീനച്ചട്ടിയിൽ രണ്ടു ടീസ്പൂൺ പഞ്ചസാരയിട്ട് ചൂടായി വരുമ്പോൾ ചെറുതായി അരിഞ്ഞുവച്ചിരിക്കുന്ന സവോള കാരമലൈസ് ചെയ്ത് മാറ്റിവയ്ക്കുക.
∙ നീളത്തിൽ അരിഞ്ഞെടുത്ത ഉരുളക്കിഴങ്ങ് എണ്ണയിൽ വറുത്തെടുത്ത് വയ്ക്കണം.
∙ഒരു ബൗളിൽ മുട്ട പൊട്ടിച്ചൊഴിച്ച് ഉപ്പ്,കുരുമുളകുപൊടി, വറ്റൽ മുളകുപൊടി എന്നിവ ചേർത്ത് നന്നായി അടിച്ചെടുക്കണം. കാരമലൈസ് ചെയ്ത സവോളയും വറുത്തെടുത്ത ഉരുളക്കിഴങ്ങും ഇതിലേക്കു ചേർത്ത് നന്നായി യോജിപ്പിച്ചെടുക്കണം.
∙ പാൻ ചൂടാക്കി ആവശ്യത്തിന് എണ്ണയൊഴിച്ച് ഈ കൂട്ട് ചെറുതീയിൽ മൂടിവച്ച് വേവിച്ചെടുക്കണം. വെന്തു കഴിഞ്ഞ് മുകളിൽ ചീസ് ഇട്ട് പാത്രത്തിലേക്ക് മാറ്റാം.
ഹാഷ് ബ്രൗൺസ്
- ഉരുളക്കിഴങ്ങ് – 2
- മുട്ട –1
- ചീസ് ചീകിയെടുത്തത് – 2 ടീസ്പൂൺ
- ഉപ്പ് – ആവശ്യത്തിന്
- വറ്റൽ മുളക് ചതച്ചത് – 2 ടീസ്പൂൺ
- മൈദ – 2 ടീസ്പൂൺ
പാചകരീതി
∙ ഉരുളക്കിഴങ്ങ് നന്നായി ചീകിയെടുക്കുക. (വെള്ളം നന്നായി കളയണം)
∙ ഒരു ബൗളിൽ മുട്ടപൊട്ടിച്ചൊഴിച്ച് ഉപ്പും ചീസും ചേർത്ത് നന്നായി യോജിപ്പിച്ചെടുക്കണം. ഇതിലേക്ക് ഉപ്പും വറ്റൽ മുളക് ചതച്ചതും മൈദയും ഉരുളക്കിഴങ്ങ് ചീകിയതും ചേർത്ത് നന്നായി യോജിപ്പിച്ചെടുക്കുക. അര ഇഞ്ച് കനത്തിൽ പരത്തിയെടുച്ച് ഫ്രൈയിങ് പാനിൽ വറുത്തെടുക്കാം.
ഫോം കോഫി
ചേരുവകൾ
- കോഫി പൗഡർ – 2 ടീസ്പൂൺ
- പഞ്ചസാര – 3 1/2 ടീസ്പൂൺ
- ചൂട് പാൽ – ആവശ്യത്തിന്
തയാറാക്കുന്ന വിധം
കപ്പിൽ കോഫി പൗഡറും പഞ്ചസാരയും ഒരു ടീസ്പൂൺ വെള്ളം ചേർത്ത് ഫോർക്കുപയോഗിച്ച് നന്നായി യോജിപ്പിക്കണം. ഇതിലേക്കു ചൂടു പാൽ ചേർത്ത് ഇളക്കി വിളമ്പാം.