കാത്തിരിക്കാൻ വയ്യ! വെറും 3 ദിവസം കൊണ്ട് പുതിയ രുചിയിൽ ഇഞ്ചി വൈൻ ഉണ്ടാക്കാം

ക്രിസ്മസിന് കേക്ക് മാത്രമല്ല മാറ്റുകൂട്ടുന്നത്, വൈനും സൂപ്പറാണ്. മുന്തിരി മാത്രമല്ല പൈനാപ്പിളും ബീറ്റ്റൂട്ടും പഴവുമൊക്കെ വൈൻ ഉണ്ടാക്കാറുണ്ട്. ഇതിൽ നിന്നുമൊക്കെ വ്യത്യസ്തമായി വെറും 3 ദിവസം കൊണ്ട് എളുപ്പത്തിൽ വൈൻ തയാറാക്കിയാലോ? ഇഞ്ചിയാണ് താരം. രുചികരവും ആരോഗ്യകരവുമായ ഇഞ്ചി വൈൻ തയാറാക്കുന്നതെങ്ങനെയെന്നു പരിചയപ്പെടാം.

ചേരുവകൾ 

ഇഞ്ചി     - 250 ഗ്രാം
 പഞ്ചസാര - 13 ടേബിള്‍സ്പ്പുൺ
ഈസ്റ്റ് - 1 ടേബിള്‍സ്പ്പുൺ
വെള്ളം - 1ലിറ്റർ
ചൂടുവെള്ളം - 1 കപ്പ് 
നാരങ്ങ - 1 എണ്ണം 
ഏലയ്ക്ക - 4 എണ്ണം 
ഗ്രാമ്പു - 6 എണ്ണം 
കറുവപ്പട്ട 1 ഇഞ്ച് കഷണം 
ഉണക്ക മുന്തിരി - 1/4 കപ്പ് 
തയാറാക്കുന്ന വിധം

കഴുകി വൃത്തിയാക്കിയ ഇഞ്ചി ആവശ്യത്തിന് വെള്ളം ചേർത്ത് അരച്ചെടുക്കാം. ശേഷം അരിച്ചെടുക്കാം. ഒരു ടേബിള്‍സ്പ്പുൺ പഞ്ചസാര, ഈസ്റ്റ്, കുറച്ചു ഇളംചൂട് വെള്ളം എന്നിവ ചേർത്ത് ഒരു പാത്രത്തിൽ ഈസ്റ്റ് പൊങ്ങാൻ വയ്ക്കുക. 

ചുവടുകട്ടിയുള്ള ഒരു പാത്രത്തിൽ കാൽ കപ്പ് പഞ്ചസാര കരിച്ചെടുത്ത ശേഷം അതിലേക്ക് ഒരു കപ്പ് തിളച്ച വെള്ളം, കറുവപ്പട്ട, ചതച്ച ഗ്രാമ്പൂ ,ഏലയ്ക്കാ, ഉണക്കമുന്തിരി, കുരുകളഞ്ഞ് നാരങ്ങ, വെള്ളം എന്നിവ ചേർത്ത് നല്ലതുപോലെ തിളപ്പിച്ച ശേഷം, ഇഞ്ചിനീര് കൂടി ചേർത്ത്  കുറച്ചുസമയം തിളപ്പിക്കുക, ചൂട് അല്പം ആറിയശേഷം പൊന്തി വന്ന ഈസ്റ്റ് കൂടി ചേർത്ത് കൊടുക്കുക.

ചൂടാറിയശേഷം വൈൻ അടച്ചുവച്ച് വെളിച്ചവും അനക്കവും തട്ടാതെ സൂക്ഷിക്കുക. പിറ്റേദിവസം അതേസമയം വൈൻ അരിച്ചെടുത്ത് വായുവും വെള്ളവും കടക്കാതെ കുപ്പിയിൽ അടച്ചുവച്ച് സൂക്ഷിക്കുക. പിറ്റേദിവസം രുചികരവും ആരോഗ്യകരവുമായ ഇഞ്ചി വൈൻ തയാറായിക്കഴിഞ്ഞു.