ഈന്തപ്പഴവും പച്ചമുളകുമുണ്ടോ? എത്ര കഴിച്ചാലും മതിവരാത്ത ഒരു അടിപൊളി വിഭവം ഇതാ!

ചോറിന്‍റെ കൂടെ കഴിക്കാന്‍ കറികളോ തോരനോ പപ്പടമോ ഒന്നും ഇല്ലാതിരിക്കുന്ന സമയത്ത്, ഒരു അടിപൊളി ഈന്തപ്പഴ അച്ചാര്‍ ആയാലോ? പച്ചമുളകും ഈന്തപ്പഴവും ഉപയോഗിച്ച് ഉണ്ടാക്കുന്ന ഈ 'സ്വീറ്റ് ആന്‍ഡ്‌ സ്പൈസി' വിഭവം, മധുരപ്രേമികള്‍ക്കും എരിവ് വേണ്ടവര്‍ക്കും ഒരുപോലെ ഇഷ്ടപ്പെടും. കുറഞ്ഞ ചേരുവകള്‍ ഉപയോഗിച്ച്, എളുപ്പത്തില്‍ ഉണ്ടാക്കാന്‍ പറ്റുന്ന ഒരു അടിപൊളി ഈന്തപ്പഴ അച്ചാര്‍ പരീക്ഷിച്ചു നോക്കൂ!

ചേരുവകൾ

എള്ളെണ്ണ - 2 ടേബിൾസ്പൂൺ

ഈന്തപ്പഴം - 20

കടുക് - 1 ടീസ്പൂൺ

ഇഞ്ചി വെളുത്തുള്ളി പേസ്റ്റ് - 2 ടേബിൾസ്പൂൺ

പച്ചമുളക് - 12

കശ്മീരി മുളകുപൊടി - 1 ടീസ്പൂൺ

വെള്ളം - 1/2 കപ്പ്

ഉപ്പ്

വിനാഗിരി - 1/2 കപ്പ്

ശർക്കര പൊടി - 2 ടേബിൾസ്പൂൺ

കായം പൊടി - 1 ടീസ്പൂൺ

ഉണ്ടാക്കുന്ന വിധം

- ഒരു ചട്ടി അടുപ്പത്തുവെച്ച് എണ്ണ ഒഴിക്കുക. ഇതിലേക്ക് കടുക് ഇട്ടു പൊട്ടിക്കുക. ഇഞ്ചി വെളുത്തുള്ളി പേസ്റ്റ്, പച്ചമുളക് നെടുകെ കീറിയത് എന്നിവ ചേര്‍ത്ത് ഇളക്കുക. നന്നായി മൂപ്പിച്ചെടുക്കുക.

- ഇതിലേക്ക് കശ്മീരി മുളകുപൊടി, അരക്കപ്പ് വെള്ളം, ആവശ്യത്തിന് ഉപ്പ് എന്നിവ ചേര്‍ത്ത് വീണ്ടും നന്നായി ഇളക്കുക. 

- തിളച്ചുവരുമ്പോള്‍ ഈന്തപ്പഴം കുരു കളഞ്ഞത് ഇതിലേക്ക് ചേര്‍ക്കുക. ചെറിയ തീയില്‍ ഇത് നന്നായി വേവിച്ചെടുക്കുക. 

- ശേഷം, വിനാഗിരി, ശര്‍ക്കര, കായം പൊടി എന്നിവ ചേര്‍ത്ത് ഇളക്കുക. നന്നായി ചെറിയ തീയില്‍ വെള്ളം വറ്റിച്ചെടുക്കുക.

- ഇത് ബിരിയാണി, ചോറ് മുതലായവയ്ക്കൊപ്പം സൈഡ് ഡിഷ്‌ ആയി വിളമ്പാം.