രണ്ടു വർഷത്തെ കോവിഡ് മഹാമാരിക്കു ശേഷം ലോകമൊന്ന് ആശ്വാസത്തിന്റെ നെടുവീർപ്പിട്ടപ്പോഴാണ് റഷ്യ–യുക്രെയ്ൻ യുദ്ധത്തിന്റെ വരവ്. അത് ലോകരാജ്യങ്ങളിലുണ്ടാക്കിയ സാമ്പത്തിക ഭൂകമ്പം ചെറുതൊന്നുമല്ല. യുഎസ്, ബ്രിട്ടൻ, ചൈന പോലുള്ള വികസിത രാജ്യങ്ങളിലെല്ലാം പണപ്പെരുപ്പം വില്ലനായതോടെ തൊഴിലില്ലായ്മയും വിലക്കയറ്റവും സാധാരണക്കാരന്റെ ജീവിതത്തെ തകിടംമറിച്ചു. പുതുതായി തിരഞ്ഞെടുക്കപ്പെട്ട ഭരണാധികാരികൾക്കു പോലും സാമ്പത്തിക അടിത്തറ ഉറപ്പിക്കാൻ സാധിക്കാതെ വന്നതോടെ അവരുടെ രാഷ്ട്രീയഭാവിയും അനിശ്ചിതത്വത്തിലായി. ബ്രിട്ടനെ സംബന്ധിച്ച് മുൻ പ്രധാനമന്ത്രി ലിസ് ട്രസ്സ് അടിയറവു പറഞ്ഞതോടെ പകരമായെത്തിയ ഋഷി സുനകിലാണ് രാജ്യത്തിന്റെ മുഴുവൻ പ്രതീക്ഷയും.
