20 രൂപയ്ക്ക് ജീവനെടുക്കുന്ന ലഹരി; ‘സർക്കാരിന്റെ മദ്യം വാങ്ങാനാവണ്ടേ?’; വിജയ് ചോദിച്ചു, ‘സ്റ്റാലിൻ എവിടെ’?

കള്ളക്കുറിച്ചി– തമിഴ്നാടിന്റെ ദുരന്ത ചരിത്രത്തിൽ ഈ പേരു കൂടി ഇനി എഴുതിച്ചേർക്കപ്പെടും. സ്ത്രീകളടക്കം 58 ജീവനുകളാണ് കള്ളക്കുറിച്ചി വിഷമദ്യ ദുരന്തത്തിൽ ഇതുവരെ നഷ്ടമായതെന്നാണ് കണക്ക്. 2023ൽ വില്ലുപുരത്തുണ്ടായ സമാനമായ ദുരന്തത്തിൽ 23 ജീവനുകളാണ് ഇല്ലാതായത്. തമിഴ്നാടിന്റെ പല ഭാഗങ്ങളിൽ കഴിഞ്ഞ രണ്ട് വർഷത്തിനിടെയുണ്ടായ വിഷമദ്യ ദുരന്തങ്ങളിൽ 60 പേർ മരിച്ചുവെന്ന് പ്രതിപക്ഷം ആരോപിക്കുന്നു. ഗുരുതരമായ ആരോഗ്യപ്രശ്നങ്ങളോടെ മരിച്ചു ജീവിക്കുന്നവർ വേറെയും. കള്ളക്കുറിച്ചിയിലെ ദുരന്തത്തിൽ മരിച്ചവരിൽ 32 പേരും കരുണാപുരം എന്ന ദളിത് ​ഗ്രാമത്തിൽ നിന്നുള്ളവരാണെന്നത് ഏറെ വേദനാജനകം. സ്ത്രീ പുരുഷ വ്യത്യാസമില്ലാതെ മൃതദേഹങ്ങൾ കത്തിയമരുന്ന നൊമ്പരക്കാഴ്ചയ്ക്കാണ് കരുണാപുരം സാക്ഷിയായിക്കൊണ്ടിരിക്കുന്നത്. ദുരന്തവും തുടർന്നുണ്ടായ പ്രതിഷേധവും എന്തായാലും സംസ്ഥാന രാഷ്ട്രീയത്തിൽ വലിയ കോളിളക്കം സൃഷ്ടിച്ചു കഴിഞ്ഞു.