പട്ടായയിലെ നൈറ്റ് ലൈഫ് ഷൂട്ടിൽപ്പെട്ട് മലയാളി; കേരളത്തിലെത്തിയപ്പോൾ കോൾ വന്നു; ഹിറ്റായത് ‌‘വഴിയരികിൽ കണ്ടകാര്യം’

അതേസമയം ഒറ്റയ്ക്കാണെങ്കിൽ നിറയെ സസ്പെൻസ് നിറച്ചാവും യാത്ര. അപ്പോൾ തോന്നുന്ന വഴികളും പ്ലാനുമായിരിക്കും. ഒരിടത്ത് എത്തിയ ശേഷമാവും ഇനി എങ്ങോട്ട് പോകണം എന്നത് തീരുമാനിക്കുക. അവിടെ എത്താനുള്ള വഴികളും മുൻകൂട്ടി തീരുമാനിക്കുകയില്ല. അപ്പോൾ തോന്നുന്നപോലെ മുന്നോട്ടെന്ന രീതി. ബൈക്കിൽ യാത്ര തിരിക്കുമ്പോൾ ദിവസം കുറഞ്ഞത് 400 കിലോമീറ്ററെങ്കിലും യാത്ര ചെയ്യും. പിന്നീട് മുറിയെടുത്ത് തങ്ങും. സോളോ ട്രിപ്പിൽ ബൈക്കിൽ കശ്മീരിലേക്കുള്ള യാത്ര മറക്കാനാവാത്തതാണ്. ഇതിൽ കശ്മീരിൽ നിന്നും തിരികെ ന്യൂഡൽഹി വരെ എവിടെയും തങ്ങാതെ ഒറ്റ റൈഡിലാണ് എത്തിയത്. 

∙ ഗ്രാമങ്ങളിൽ പോകണം ജീവിതം അറിയണം

‘‘വഴിയരികിൽ കണ്ടതാണ്...’’ ശന്തനുവിന്റെ വിഡിയോയിൽ ഈ വാചകം സാധാരണമാണ്. ഇതുകേട്ടുകഴിഞ്ഞാൽ ഉറപ്പിക്കാം രസകരമായ ഒരു പുതിയ അറിവ് നമുക്കായി ഒരുക്കിയിട്ടുണ്ടെന്ന്. യാത്ര ചെയ്ത് ഒരിടത്ത് എത്തിയാൽ അവിടെയുള്ള ടൂറിസ്റ്റ് സ്ഥലങ്ങളിൽ പോകുന്നതിനേക്കാളും ഉൾനാടുകളിലേക്ക് പോകാനാണ് ശന്തനുവിന് താൽപര്യം.  ഗ്രാമീണരുമായും വഴിയിൽ കച്ചവടം നടത്തുന്നവരുമായൊക്കെ സംസാരിക്കും. പ്രധാനമായും അവരുടെ തൊഴിൽ, അതിൽനിന്നു ലഭിക്കുന്ന വരുമാനം ഇതെല്ലാം ചോദിച്ച് മനസ്സിലാക്കിയാവും മുന്നോട്ടുള്ള യാത്രകൾ. 

∙ ഭാഷയൊരു പ്രശ്നമേയല്ല

ആൻഡമാനിലെ യാത്രയ്ക്കിടെ വിഡിയോയിൽ നീതു ഒരു സ്ത്രീയുമായി സംസാരിച്ചു നിൽക്കുന്നത് കാണാം. വിവരണത്തിൽ അപ്പോൾ ശന്തനു ചോദിക്കുന്നത്, എന്ത് ഭാഷയിലാണ് നീതു കാര്യങ്ങൾ ചോദിക്കുന്നതെന്നാണ്. ഈ ചോദ്യം നമ്മൾ ശന്തനുവിനോട് ചോദിച്ചാലോ? കേരളത്തിന് പുറത്തുള്ള യാത്രകളിൽ അവിടെയുള്ള ഭാഷകൾ വശമില്ലെങ്കിലും അതുകൊണ്ടൊരു ബുദ്ധിമുട്ട് ഇതുവരെയുണ്ടായിട്ടില്ലെന്നാണ് ശന്തനു പറയുന്നത്.

‘‘ഉത്തരേന്ത്യൻ സംസ്ഥാനങ്ങളിൽ ഗ്രാമീണർക്ക് ഹിന്ദിമാത്രമേ അറിയുകയുള്ളൂ. ഞാനാണെങ്കിൽ എട്ടുവരെ മാത്രമേ സ്കൂളിൽ ഹിന്ദി പഠിച്ചിട്ടുള്ളൂ. പിന്നീട് ടെക്നിക്കൽ സ്കൂളിലായിരുന്നു പഠനം. പക്ഷേ എന്നിട്ടും ഗ്രാമീണരുമായും മറ്റും ആശയവിനിമയം നടത്തുമ്പോൾ എനിക്ക് ബുദ്ധിമുട്ടുകൾ ഉണ്ടായിട്ടില്ല. യാത്രകൾ കൂടിയപ്പോൾ എന്റെ ഹിന്ദിയും നന്നായിത്തുടങ്ങിയിട്ടുണ്ട്. ഭാഷ അറിയില്ലെന്നുവച്ച് തട്ടിപ്പിനൊന്നും ഇരയായിട്ടില്ല. ഉത്തരേന്ത്യയിലേക്കു യാത്ര ചെയ്യുമ്പോൾ ഹിന്ദി അറിയാത്തവരെ അവിടെയുള്ളവർ പറ്റിക്കുമെന്ന് പറയുമെങ്കിലും അങ്ങനെയൊരു അനുഭവം എനിക്കുണ്ടായിട്ടില്ല.’’

∙ മലയാളിയോടുള്ള സമീപനം

ശന്തനുവിന്റെ വിഡിയോകളിലെ പ്രധാന വിഭാഗമാണ് മലയാളിയോടുള്ള സമീപനം. മറുനാട്ടുകാരുടെ മനസ്സിൽ മലായാളിയെ കുറിച്ചുള്ള ധാരണ എന്താണ് എന്നറിയുകയാണ് ഉദ്ദേശം. സംസാരിച്ച് തുടങ്ങുന്നതിന് മുൻപേ, വാഹനത്തിന്റെ റജിസ്ട്രേഷൻ നമ്പർ കണ്ടാണ് മിക്കവരും കേരളത്തിൽ നിന്നാണ് വരുന്നതെന്ന് മനസ്സിലാക്കുന്നത്. മറ്റു സംസ്ഥാനങ്ങളിലുള്ള മലയാളികളായ ആളുകളാണ് ഇത്തരത്തിൽ പ്രധാനമായും പരിചയപ്പെടാൻ വരുന്നത്. എന്നാൽ അവിടെയുള്ള നാട്ടുകാർ പ്രത്യേകിച്ച് ഗ്രാമവാസികൾ എന്നെ പലപ്പോഴും കണ്ടിട്ടുള്ളത് ഒരു അദ്ഭുത ജീവിയെ നോക്കുന്നതു പോലെയും. അന്യനാടുകൾ കാണുന്നതിനായി മാത്രം നാടുവിട്ട് ദീർഘയാത്ര ചെയ്യുന്നവർ അവർക്ക് ഇന്നും അദ്ഭുതമാണ്. 

മലയാളി എന്നുപറയുമ്പോൾ അന്യനാട്ടുകാർക്ക് പ്രത്യേക സ്നേഹമാണ്. മലയാളി അല്ലെങ്കിൽ ദക്ഷിണേന്ത്യക്കാരൻ എന്ന നിലയിൽ മോശം അനുഭവം എനിക്ക് ഇന്ത്യയിൽ എവിടെ നിന്നും ഉണ്ടായിട്ടില്ല.  ഉത്തരേന്ത്യൻ ഗ്രാമങ്ങളിലൂടെ സഞ്ചരിക്കുമ്പോൾ മലയാളി പഠിപ്പുള്ളവരാണ് എന്ന ചിന്ത അവിടെയുള്ളവരിൽ കൂടുതലായിട്ടുണ്ടെന്ന് തോന്നിയിട്ടുണ്ട്. കേരളത്തിൽ സാക്ഷരത കൂടുതലാണെന്ന് അവർ ഓർത്തെടുത്ത് പറഞ്ഞ സംഭവവും എനിക്കുണ്ടായിട്ടുണ്ട്. സംസാരിക്കുമ്പോള്‍ ശരിക്കും  ഭാഷ മനസ്സിലാക്കാൻ ബുദ്ധിമുട്ടാണെങ്കില്‍ കൂടി അവർ താൽപര്യത്തോടെ മറുപടി പറയുന്നത് ഞാൻ ശ്രദ്ധിച്ചിട്ടുണ്ട്. 

പലപ്പോഴും മറുനാട്ടിലുള്ളവരുടെ  കരുതലൊക്കെ അനുഭവിച്ചിട്ടുള്ള അവസരമുണ്ട്. ഒരിക്കൽ കർണാടകയിൽ ഹോട്ടലിൽ മുൻകൂട്ടി ബുക്ക് ചെയ്ത് പോയപ്പോൾ ഒരു അനുഭവമുണ്ടായി. അവിടെ ചെന്നതിനും അടുത്ത ദിവസമാണ് ശരിക്കും ഞാൻ ബുക്ക് ചെയ്തിരുന്നത്. എന്നാൽ ഇതറിയാതെ തലേന്നാൾ എത്തി. സാധാരണ ഓൺലൈൻ ബുക്ക് ചെയ്തു ചെല്ലുന്നവരെ ഹോട്ടലുകാർ പറ്റിക്കുമെന്നെല്ലാം കേട്ടിട്ടുണ്ടെങ്കിലും എനിക്കുണ്ടായത് മറ്റൊരു അനുഭവമാണ്. അബദ്ധം പറ്റിയതാണെന്ന് മനസ്സിലാക്കിയ ഹോട്ടൽ ജീവനക്കാർ നല്ലരീതിയിൽ സഹായിച്ചു. പണം നഷ്ടമാവാതെ, അവിടെ എത്തിയ ദിവസം മുറി നല്‍കി സഹായിച്ചു.  ഇതൊക്കെ  നമ്മുടെ നാട്ടുകാരെ അറിയിക്കാൻ കൂടിയാണ് 'മലയാളികളോടുള്ള സമീപനം' എന്ന തലക്കെട്ടിൽ വിഡിയോ ചെയ്യുന്നത്. 

ഒരിക്കൽ ഉത്തരേന്ത്യയിൽ യാത്ര നടത്തി ഒരു ഹോട്ടലിൽ നിന്നും മറ്റൊരു സ്ഥലത്തേക്ക് പുറപ്പെടാൻ തുടങ്ങുമ്പോൾ ഒരാളെത്തി ഇങ്ങോട്ടു പരിചയപ്പെട്ടു. കേരളത്തിലെ കൈതച്ചക്കയെ കുറിച്ചായിരുന്നു അയാൾക്ക് അറിയേണ്ടിയിരുന്നത് ഒപ്പം അതിന്റെ വ്യാപാര സാധ്യതകളും.  

∙ തുടങ്ങി വിദേശ യാത്രയും, ഫാമിലിയായി പട്ടായയിൽ

ഇന്ത്യയിലെ യാത്രകൾക്ക് ശേഷമാണ് തായ്‌ലൻഡിലേക്കും മലേഷ്യയിലേക്കും യാത്രപോയത്. കൂടുതല്‍  യാത്രകൾക്കു വേണ്ടിയുള്ള പ്ലാനിങ്ങിലാണിപ്പോൾ. തായ്‌ലൻഡിലെ യാത്രകൾ ഏറെ രസകരമായിരുന്നു. എന്നാൽ പട്ടായയിൽ ചെന്നപ്പോഴാണ് ഷൂട്ട് ചെയ്യാൻ ബുദ്ധിമുട്ടിയത്. അവിടെ ധാരാളം മലയാളികൾ സന്ദർശകരായി എത്തിയിരുന്നു. നൈറ്റ് ലൈഫ് ഉൾപ്പെടെ ഷൂട്ട് ചെയ്യുമ്പോൾ മലയാളികളെ ഒഴിവാക്കാനായിരുന്നു ശ്രദ്ധ. എന്നിട്ടും വിഡിയോ പുറത്തുവന്നപ്പോള്‍ ഒരു മലയാളി അതിൽപ്പെട്ടു. അദ്ദേഹം എന്നെ വിളിച്ചു. മുഖം വിഡിയോയിലുണ്ടെന്നും അത് ഡിലീറ്റ് ചെയ്യണമെന്നും ആവശ്യപ്പെട്ടപ്പോഴാണ് കാര്യം അറിയുന്നത്.

തായ്‌ലൻഡ് ഫാമിലിയായി പോകാൻ പറ്റിയ സ്ഥലമാണ്. ബാച്ചിലേഴ്സിനുള്ള സ്ഥലമാണ് ഇതെന്നത് തെറ്റിദ്ധാരണയാണ്. പട്ടായ മാത്രമല്ല അവിടെ കാണാനുള്ള പ്രധാന സ്ഥലം എന്നോർക്കുക. ക്രാബി എന്ന സ്ഥലം ഫാമിലിയായി സന്ദർശിക്കാൻ പറ്റിയ ഇടമാണ്.  ഇന്ത്യയുടെ ഭാഗമായ ആൻഡമാനിൽ സന്ദർശനം നടത്തിയതിന് പിന്നാലെയാണ് ശന്തനു തായ്‌ലൻഡിലേക്കു പോകുന്നത്. ഭൂമിശാസ്ത്രപരമായി ഈ രണ്ടു സ്ഥലങ്ങളും തമ്മിൽ വലിയ ദൂരമില്ല. എന്നാൽ കാഴ്ചയിലും ജീവിതത്തിലും രണ്ടും രണ്ടു ലോകമാണ്. 

∙ ദിവസേന ബജറ്റവതരണം 

യാത്രകളിൽ‍ ഒരോ ദിവസവും തനിക്കുണ്ടായ ചെലവ് കൃത്യമായി എഴുതിക്കൂട്ടി വിഡിയോയിലൂടെ അറിയിക്കാറുണ്ട് ശന്തനു. പ്രധാനമായും സ്ഥലങ്ങൾ കാണാൻ ആഗ്രഹമുള്ള ആളുകൾക്ക് വേണ്ടിയാണ് ഇതു ചെയ്യുന്നത്. ഒരു ദിവസം മുഴുവൻ യാത്ര ചെയ്തുള്ള കാഴ്ചകളാണ് പത്തോ ഇരുപതോ മിനിട്ട് ദൈർഘ്യമുള്ള വിഡിയോയിലൂടെ കാണിക്കുന്നത്. ഇതിനാൽ ആ ദിവസത്തെ ചെലവ് എത്രയായി എന്ന് പ്രത്യേകം പറഞ്ഞാൽ മാത്രമേ കാഴ്ചക്കാർക്ക് മനസ്സിലാകുകയുള്ളൂ. യാത്രകളിൽ തോന്നിയിട്ടുള്ള പ്രധാനകാര്യം മിക്ക സംസ്ഥാനങ്ങളിലും യാത്രയ്ക്കുള്ള ചെലവ് ഏതാണ്ട് ഒരുപോലെയാണെന്നാണ്. നമ്മൾ താമസത്തിനും ഭക്ഷണത്തിനുമായി തിരഞ്ഞെടുക്കുന്ന ഹോട്ടലുകളുടെ നിലവാരം പോലിരിക്കും ചെലവുകളിലെ വ്യത്യാസമെന്നാണ് ശന്തനുവിന്റെ അഭിപ്രായം.