അറുത്തുമാറ്റുമെന്നറിഞ്ഞിട്ടും താലികെട്ടുന്ന തിരുനങ്കമാ‍ർ; സുമംഗലിയായി ഒറ്റരാത്രി; ചിരിച്ചും പിന്നെ നിലവിളിച്ചും കൂവാഗം

മഹാഭാരതയുദ്ധത്തിൽ പാണ്ഡവർ വിജയിക്കണമെങ്കിൽ 32 പുരുഷലക്ഷണങ്ങളുമൊത്ത ഒരാളെ കാളിക്ക് ബലി കൊടുക്കണമായിരുന്നത്രെ. അങ്ങനെ ഒരാളാണ്, അർജുനന് ഉലൂപിയിൽ ഉണ്ടായ പുത്രനായ ഇരാവാൻ. ബലിയാകാൻ തയാറായ ഇരാവാൻ പക്ഷേ, തനിക്ക് ഇതുവരെ മംഗല്യഭാഗ്യം അനുഭവിക്കാനായിട്ടില്ലെന്ന സങ്കടം കൃഷ്ണനുമായി പങ്കുവച്ചു. ബലിയാകാൻ നിൽക്കുന്ന ആളെ വിവാഹം കഴിക്കാൻ ഏതെങ്കിലും പെൺകുട്ടി തയാറാകുമോ? അങ്ങനെ കൃഷ്ണൻ മോഹിനിരൂപം പൂണ്ട് ഇരാവാനെ വിവാഹം കഴിച്ചെന്നും പിറ്റേന്ന് യുദ്ധത്തിനൊടുവിൽ ഇരാവാൻ ബലിയായെന്നുമാണു കഥ. ഇരാവാനെ കൃഷ്ണൻ കൂത്താണ്ടവരായി കൂവാഗത്ത് പ്രതിഷ്ഠിച്ചത്രെ. മോഹിനി ഒറ്റദിവസം കൊണ്ട് വിധവയായതുപോലെ ആയിരക്കണക്കിനു മോഹിനിമാർ വൈധവ്യം ഏറ്റുവാങ്ങാനൊരുങ്ങി താലി കെട്ടാനെത്തുകയാണു കൂവാഗത്ത്. ദക്ഷിണേന്ത്യയിലെ ആയിരക്കണക്കിന് ട്രാൻസ് വനിതകളാണ് ആ ദിവസം ഇവിടെ താലി കെട്ടാനെത്തുന്നത്.