നമ്മുടെ ഹൃദയം ആ സ്നേഹം ഒരിക്കലും മറക്കില്ല കുട്ടീ...: ഊർമിള ഉണ്ണി എഴുതുന്നു, 'നീലാംബരി' എന്റെയും നഷ്ടം

പുന്നയൂർകുളത്താണ് എലിയങ്ങാട്ട് കോവിലകം. കുട്ടിക്കാലത്ത് എനിക്ക് അവിടെ പോകാൻ വലിയ ഇഷ്ടമായിരുന്നു. തൃശൂരിൽനിന്നു പോകുമ്പോൾ പൂങ്കുന്നം കഴിഞ്ഞാൽ റോഡിന് ഇരുവശവും പാടങ്ങളാണ്. നല്ല കാറ്റും. മനോഹരമായിരുന്നു ആ യാത്രകൾ. കോവിലകത്ത് ഒരുപാട് അംഗങ്ങളുണ്ട്. ഞങ്ങൾ കുട്ടികൾ പറമ്പിലൊക്കെ ഓടിക്കളിക്കും. കുമാരി ചേച്ചി ദൂരേക്ക് കൈ ചൂണ്ടിക്കാണിക്കും ‘‘അവിടെയാണ് നാലപ്പാട്ട് തറവാട്. എഴുത്തുകാരി ബാലാമണിയമ്മ അവിടെയാണു താമസിക്കുന്നത്. മകൾ മാധവിക്കുട്ടി ഇടയ്ക്ക് ഇവിടെ വരുമായിരുന്നു ഇപ്പോൾ കല്യാണമൊക്കെ കഴിഞ്ഞ് ബോംബെയിലാ.’’