കോടികളിറക്കി അംബാസഡറായി സുധ; സ്വകാര്യ എസ്റ്റേറ്റിൽ ‘ഗാല’; ഇങ്ങനെയാണോ ഒരു ഇന്റർനാഷനൽ ഇവന്റ് നടത്തേണ്ടത്?

തെലങ്കാന, സരൂർ ആനാ! – ഇന്ത്യയെയും ലോകത്തെയും തെലങ്കാനയിലേക്ക് ക്ഷണിച്ചാണ് രേവന്ത് റെഡ്ഡി സർക്കാർ ഏറെ കൊട്ടിഘോഷിച്ച് മിസ് വേൾഡ് മത്സരം നാട്ടിലെത്തിച്ചത്. കോടികളുടെ ധൂർത്ത് ആരോപണവും മത്സരത്തിനിടെ മിസ് ഇംഗ്ലണ്ട് പുറത്തുവിട്ട വിവാദബോംബും മറികടന്ന് മേയ് അവസാനവാരം ഹൈദരാബാദിലെ ഹിറ്റെക്സ് എക്സിബിഷൻ സെന്ററിൽ മിസ് വേൾഡ് ഫിനാലെ അരങ്ങേറി. ലോകസുന്ദരി കിരീടം ചൂടിയത് തായ്‌ലൻഡ് സുന്ദരി ഒപൽ സുചത; ഇന്ത്യയിലെ മത്സരത്തിന്റെ രണ്ടാം ഊഴത്തിലെങ്കിലും കിരീടം തിരിച്ചെടുക്കാമെന്ന സ്വപ്നം അസ്ഥാനത്താക്കി അവസാന എട്ടിൽ പോലും ഉൾപ്പെടാതെ മിസ് ഇന്ത്യ പുറത്താവുകയും ചെയ്തു.