കനിഷ്‌ക ബോംബിങ്: സഞ്ജയ് മറക്കില്ല ഖലിസ്ഥാനി ഭീകരരുടെ ‌ആ പുച്ഛച്ചിരി; ഇന്നും ഓർമയുടെ കടലാഴങ്ങളിൽ അച്ഛനും കുഞ്ഞുപെങ്ങളും

പരാജയപ്പെട്ട പരീക്ഷയിലൂടെ ജീവിതത്തിലേക്കു തിരിച്ചുവന്നയാളാണ് സ‍ഞ്ജയ് ലാസർ. വിജയിച്ചിരുന്നെങ്കിൽ‌ ഉറ്റവർക്കൊപ്പം അയാളും മരണത്തിന്റെ ചിറകിലേറി മാഞ്ഞു പോകുമായിരുന്നു. മുടങ്ങിപ്പോയ ആ യാത്രയെക്കുറിച്ചുള്ള ഓർമകളും വേദനകളും ഇന്നും അദ്ദേഹത്തെ വിടാതെ പിന്തുടരുന്നു. ആ യാത്രയിൽ 17 വയസ്സുകാരനായ സഞ്ജയും ഉണ്ടാകേണ്ടതായിരുന്നു. പുറപ്പെടുന്നതിന് 2 ദിവസം മുൻപ് ഇടിത്തീ പോലെ ആ വാർത്ത വന്നു: പന്ത്രണ്ടാം ക്ലാസ് പരീക്ഷയിൽ സ‍ഞ്ജയ് 3 വിഷയങ്ങൾക്കു തോറ്റു. അതിനേക്കാളേറെ ആ തോൽവി ആഘാതമേൽപ്പിച്ചത് മട്ടാഞ്ചേരി കീച്ചേരി കുടുംബാംഗമായിരുന്ന അച്ഛൻ സമ്പത്ത് ലാസറിനും രണ്ടാനമ്മ സിൽവിയയ്ക്കുമായിരുന്നു.