ഡെൽറ്റ കെ 9 – ദുരൂഹതകളുടെ കുരകളായിരുന്നു ഇതുവരെ അവിടെനിന്ന് ഉയർന്നിരുന്നത്. സെപ്റ്റംബർ 24നു രാത്രി 10.30നു പൊലീസ് കോട്ടയം കുമാരനല്ലൂരിലെ നായ വളർത്തൽ കേന്ദ്രമായ ഡെൽറ്റ കെ 9ലേക്ക് ഇരച്ചു കയറിയതോടെയാണ് ദുരൂഹതയ്ക്ക് അവസാനമായത്. 17.8 കിലോ കഞ്ചാവാണ് പാറമ്പുഴ സ്വദേശി റോബിൻ ജോർജ് അവിടെ ഒളിപ്പിച്ചിരുന്നത്. പൊലീസ് ഇരച്ചു കയറിയതോടെ പരിശീലനം സിദ്ധിച്ച നായ്ക്കളെ പൊലീസിനു നേരെ അഴിച്ചുവിട്ട ശേഷം റോബിൻ ഓടി രക്ഷപ്പെടുകയായിരുന്നു. തമിഴ്നാട്ടിൽനിന്നു റോബിൻ പിടിയിലായെങ്കിലും ഒട്ടേറെ ചോദ്യങ്ങൾ പൊലീസിനു മുന്നിൽ ഇനിയും ബാക്കിയാണ്. നായ പരിശീലനത്തിന്റെ മറവിൽ എത്ര കാലമായി ഇയാൾ കഞ്ചാവ് വ്യാപാരം നടത്തുന്നു? ഇയാൾക്കു കഞ്ചാവ് എത്തിക്കുന്നത് ആര്? അക്രമകാരികളായ നായ്ക്കളെ പരിശീലിപ്പിക്കുന്ന റോബിന്റെ പശ്ചാത്തലം എന്താണ്?