2014ൽ ബിജെപി വെട്ടിയത് അഡ്വാനിയുടെ പേര്; ആക്ഷേപിച്ചയാളെ പ്രോടെം സ്പീക്കറാക്കി ഞെട്ടിച്ച നെഹ്റുവും

പ്രോടെം സ്പീക്കറെ നിയമിക്കാൻ സഭയിലെ സീനിയോറിറ്റി കണക്കിലെടുക്കുന്നതാണ് പൊതുവേയുള്ള കീഴ്‌വഴക്കം. എന്നാൽ, ഇത്തവണത്തേതുപോലെ മുൻപും ഇതു തെറ്റിച്ചിട്ടുണ്ട്. രാഷ്ട്രീയവഞ്ചകനെന്ന് ആക്ഷേപിച്ചയാളെ പ്രോടെം സ്പീക്കറും പിന്നാലെ ഡപ്യൂട്ടി സ്പീക്കറുമാക്കിയ ആദ്യ പ്രധാനമന്ത്രി ജവാഹർലാൽ നെഹ്റുവിന്റെ നീക്കം കൗതുകകരമായിരുന്നു. ആദ്യ ലോക്സഭാ സ്പീക്കർ ജി.വി.മാവ്‌ലങ്കറിന്റെ വിയോഗത്തോടെ 1956 ൽ പുതിയ സ്പീക്കറെ തിരഞ്ഞെടുക്കേണ്ടിവന്നു. ഡപ്യൂട്ടി സ്പീക്കർ എം.അനന്തശയനം അയ്യങ്കാർ സ്ഥാനാർഥിയായതോടെ നടപടികൾ നിയന്ത്രിക്കാനും പിന്നാലെ ഡപ്യൂട്ടി സ്പീക്കറാകാനും കോൺഗ്രസ് തിരഞ്ഞെടുത്തത് പ്രതിപക്ഷത്തെ അകാലിദൾ എംപി ഹുക്കം സിങ്ങിനെയാണ്. പേരു നിർദേശിച്ചത് നെഹ്റുവും.