‘ലിഫ്റ്റ് ഒന്നുയർന്നു, പെട്ടെന്നു ശബ്ദത്തോടെ നിന്നു, ബഹളം കൂട്ടി, നിലവിളിച്ചു, ഞാൻ കരുതി തീർന്നെന്ന്’

എക്സ്റേ എടുത്ത ശേഷം ഓർത്തോ വിഭാഗം ഡോക്ടറെ കാണാൻ മുകൾനിലയിലേക്കു പോകുന്നതിനായി 11–ാം നമ്പർ ലിഫ്റ്റിൽ കയറി. ലിഫ്റ്റിന്റെ വാതിൽ തുറന്നുകിടക്കുകയായിരുന്നു. ബട്ടൺ അമർത്തി, ലിഫ്റ്റ് ഒന്നുയർന്നു, പെട്ടെന്നു ശബ്ദത്തോടെ നിന്നു. കയ്യിലുണ്ടായിരുന്ന മൊബൈൽ ഫോൺ നിലത്തുവീണു പൊട്ടി. കുടുങ്ങിയെന്ന് എനിക്കു മനസ്സിലായി. പൊട്ടിയ മൊബൈൽ ചേർത്തുവച്ച ശേഷം വിളിക്കാൻ ശ്രമിച്ചെങ്കിലും കോൾ പോയില്ല. ലിഫ്റ്റിന്റെ വശങ്ങളിൽ ആഞ്ഞിടിച്ചു, ബഹളം കൂട്ടി, നിലവിളിച്ചു. ആരും കേട്ടില്ല. ലിഫ്റ്റിലെ ഫോണിലൂടെ പുറത്തേക്കു ബന്ധപ്പെടാൻ ശ്രമിച്ചെങ്കിലും പ്രവർത്തനരഹിതമായിരുന്നു. എമർജൻസി അലാം ഉപയോഗിക്കാൻ ശ്രമം നടത്തിയെങ്കിലും അതും പ്രവർത്തിച്ചില്ല. ലിഫ്റ്റിലെ ലൈറ്റും അണഞ്ഞതോടെ നല്ല ഇരുട്ടായി.