ലോകമാന്ദ്യം മറികടക്കാൻ ഒബാമയെ സഹായിച്ച സുഹൃത്ത്; വിരുന്നില്‍ ആദ്യ പരിഗണന; ഇന്ത്യ ഇന്നും പിന്തുടരുന്ന ‘മൻമോഹൻ മന്ത്രം’

വിക്ടർ ഹ്യൂഗോയുടെ പ്രശസ്തമായ വാചകം, ‘ശരിയായ സമയത്തുണ്ടാകുന്ന ഒരാശയത്തെ തടയാൻ ലോകത്തെ ഒരു ശക്തിക്കും കഴിയില്ല’, ഉദ്ധരിച്ചുകൊണ്ട് 1991 ജൂലൈ 24ന് ഡോ. മൻമോഹൻ സിങ് പാർലമെന്റിനെ സാക്ഷിയാക്കി ഇങ്ങനെ പ്രസ്താവിച്ചു. ‘‘ഒരു ആഗോള സാമ്പത്തിക ശക്തിയായി ഇന്ത്യ കുതിച്ചുയരുന്നത് അത്തരമൊരു ആശയമാണെന്ന് എനിക്ക് തോന്നുന്നു. ലോകം മുഴുവൻ ഇത് ഉച്ചത്തിലും വ്യക്തവുമായി കേൾക്കട്ടെ. ഇന്ത്യ ഉണർന്നു കഴിഞ്ഞു. നമ്മൾ വിജയിക്കും, നമ്മൾ മറികടക്കും’’. ഇന്ത്യൻ വിപണി ലോകത്തിനു മുൻപാകെ തുറന്നു കൊടുത്ത വിപ്ലവകരമായ ബജറ്റ് അവതരിപ്പിക്കുകയായിരുന്നു അന്നത്തെ ധനമന്ത്രിയായിരുന്ന അദ്ദേഹം. 2004 മുതല്‍ 10 വർഷം പ്രധാനമന്ത്രിയായിരുന്ന മൻമോഹൻ സിങ് അറിയപ്പെടുന്ന സാമ്പത്തിക ശാസ്ത്രജ്ഞനുമായിരുന്നു. രാജ്യത്തിന്റെ തലക്കുറി തന്നെ തിരുത്തിക്കുറിച്ച അനേകം നടപടികളുടെ ചരിത്രവും പേറിയാണ് തന്റെ 92–ാം വയസിൽ അദ്ദേഹം കടന്നു പോകുന്നത്. ‘ബുദ്ധിമാനായ, ചിന്താശക്തിയുള്ള, ശ്രദ്ധാലുവും സത്യസന്ധനുമായ, തികച്ചും അസാധാരണമായ മാന്യതയുമുള്ള വ്യക്തി’ എന്നാണ് മുൻ അമേരിക്കൻ പ്രസിഡന്റ് ബറാക് ഒബാമ ഇന്ത്യയുടെ ഈ മുൻ പ്രധാനമന്ത്രിയെക്കുറിച്ച് തന്റെ ആത്മകഥയിൽ കുറിച്ചത്.