പാര്‍ക്കിങ്ങിന് ഭൂഗര്‍ഭ നിലകൾ, വ്യായാമത്തിന് ഹാൾ; ഊർജത്തിന് സോളർ, മണ്ണ് ടൈൽ, എസി; എകെജി സെന്റര്‍ പുത്തനായി, സിപിഎമ്മോ?

രാജ്യത്തു പാർട്ടിക്കു ഭരണമുള്ള ഏക സംസ്ഥാനത്തെ പുതിയ ആസ്ഥാനമെന്ന നിലയില്‍ സകല പ്രൗഢിയും വിളിച്ചോതുന്നതാണു തിരുവനന്തപുരം പാളയത്ത് 31 സെന്റില്‍ 9 നിലകളായി സജ്ജമായ, സിപിഎമ്മിന്റെ എകെജി സെന്റര്‍. നിലവിലെ ആസ്ഥാനമായ എകെജി സെന്ററിന് എതിര്‍വശത്തു ഡോ.എന്‍.എസ്.വാരിയർ റോഡില്‍ പാര്‍ട്ടി വാങ്ങിയ 31 സെന്റിലാണ് അത്യാധുനിക സൗകര്യങ്ങളോടെ 9 നിലകളും 2 ഭൂഗര്‍ഭ പാര്‍ക്കിങ് നിലകളുമുള്ള പുതിയ ആസ്ഥാന മന്ദിരം. ഗതകാലപ്രൗഢി നിലനിര്‍ത്തി പുതുക്കിപ്പണിത സിപിഐ ആസ്ഥാനമായ എംഎന്‍ സ്മാരകവും ബിജെപിയുടെ പുതിയ ആസ്ഥാനമന്ദിരമായ മാരാര്‍ജി ഭവനും ഉദ്ഘാടനം ചെയ്തതിനു പിന്നാലെയാണു സിപിഎമ്മിന്റെ ബഹുനിലമന്ദിരം അനന്തപുരിയുടെ നഗരഹൃദയത്തില്‍ സജ്ജമായത്. കേരളത്തിലെ മാത്രമല്ല, രാജ്യത്തു തന്നെ ഒരു രാഷ്ട്രീയ പാര്‍ട്ടിയുടെ ഏറ്റവും വലിയ ആസ്ഥാന മന്ദിരങ്ങളിലൊന്നാണിത്.