‘ഇറങ്ങി വരുന്ന പലരും ഭയന്നു നിലവിളിക്കുന്നതു കാണാം’: ബൈസരണിലേക്ക് യാത്ര എങ്ങനെ? രക്ഷാപ്രവർത്തനം ദുഷ്കരമായത് എന്തുകൊണ്ട്?

കശ്മീർ യാത്രയിൽ സഞ്ചാരികൾക്ക് ഒഴിവാക്കാനാകാത്ത ഇടം. അതാണ് പഹൽഗാം. ലിഡർ നദിയുടെ തീരത്തെ ഈ ചെറുപട്ടണത്തിനോടു ചേർന്ന് കശ്മീരിനെ ഭൂമിയിലെ സ്വർഗമാക്കുന്ന ഒട്ടേറെ മനോഹര താഴ്‌വാരങ്ങളുണ്ട്. അതിൽത്തന്നെ ‘മിനി സ്വിറ്റ്സർലൻഡ്’ എന്നറിയപ്പെടുന്ന സ്ഥലമാണ് ബൈസരൺ താഴ്‌വാരം. ഇവിടെയാണ് ഏപ്രിൽ 22ന് ഭീകരതയുടെ വെടിയൊച്ചകള്‍ മുഴങ്ങിയത്. രാജ്യത്തെ നടുക്കിയ ഭീകരാക്രമണത്തിൽ ഇവിടെ പൊലിഞ്ഞത് 28 ജീവനുകൾ. അതിലൊരാൾ മലയാളി. കേരളത്തിൽനിന്നുൾപ്പെടെ ഒട്ടേറെ പേർ വിനോദസഞ്ചാരത്തിനായി എത്തുന്ന ഇടമാണ് പഹൽഗാമും ബൈസരൺ താഴ്‌വാരവും. പച്ചപ്പുൽമേടിനും ഇരുണ്ട പൈൻമരങ്ങൾക്കുമപ്പുറം മഞ്ഞണിഞ്ഞ മലനിരകൾ കാഴ്ചയുടെ വിരുന്നൊരുക്കുന്ന ഇടം. ഒട്ടേറെ ബോളിവുഡ് സിനിമകളിലെ ഗാനരംഗങ്ങൾക്കു പശ്ചാത്തലമായ സ്ഥലം കൂടിയാണിത്. വസന്തകാലത്തിന്റെ തുടക്കത്തിൽ മഞ്ഞുരുകി ലിഡർ നദി ഒഴുകിത്തുടങ്ങും. മഞ്ഞു കാലത്തിനു ശേഷം തെളിയുന്ന പച്ചപ്പിന്റെ തുടക്കവും പൂവിട്ട ആപ്പിൾ തോട്ടങ്ങളും ഉയർന്ന പ്രദേശങ്ങളിലെ മഞ്ഞിന്റെ കാഴ്ചകളും സഞ്ചാരികളെ ഇവിടേക്ക് ആകർഷിക്കുന്നു. അമർനാഥ് യാത്രയുടെ തുടക്കസ്ഥലമായ പഹൽഗാം നഗരം തെക്കന്‍ കശ്മീരിലെ അനന്ത്നാഗ് ജില്ലയിലാണു സ്ഥിതി ചെയ്യുന്നത്. ശ്രീനഗറിൽനിന്ന് 85– 90 കിലോമീറ്റർ ദൂരെയാണ് പഹൽഗാം. മഞ്ഞു മാറിയതോടെ ലിഡർ നദിയുടെ തീരങ്ങളിലെല്ലാം ഇപ്പോൾ നിറയെ സഞ്ചാരികളാണ്. പക്ഷേ ആപ്പിൾ, വാൽനട്ട് മരങ്ങൾ ഇടതൂർന്നു നിൽക്കുന്ന സുന്ദരമായ ഈ കാഴ്ചയ്ക്കു മുകളില്‍ ഇരുൾ മൂടുംവിധമാണ് ഭീകരാക്രമണമുണ്ടായത്. ‘എ–ബി–സി’ എന്നറിയപ്പെടുന്ന ആരു, ബേത്താബ്, ചന്ദൻ വാരി എന്നിവിടങ്ങളിലേക്കുള്ള കാർ യാത്രയും ഇവിടേക്കെത്തുന്ന സഞ്ചാരികൾ ഏറെ ഇഷ്ടപ്പെടുന്നതാണ്. താമസിക്കാൻ ഒട്ടേറെ റിസോർട്ടുകളും ഹോം സ്റ്റേകളും ഇവിടെയുണ്ട്. പഹൽഗാമിലെ പാർക്കിങ് ഗ്രൗണ്ടിനു സമീപത്തുനിന്ന് കുതിരപ്പുറത്തോ കാൽനടയായോ വേണം ബൈസരണിലെ പുൽമേട്ടിലേക്കെത്താൻ. ഈ യാത്രയിലെ