‘ഇതാ ചന്ദ്രയാൻ...ഇന്ത്യൻ യുവാക്കൾക്ക് സ്വപ്നം കാണുന്നതെല്ലാം നേടാൻ കഴിയുമെന്നതിന്റെ തെളിവ്’; കസ്തൂരിരംഗൻ: ഇന്ത്യൻ മാനത്തെ കസ്തൂരിമാൻ

‘മോന് അമ്പിളിമാമനെ പിടിച്ചു തരാട്ടോ’ – കുട്ടികൾക്ക് സൗജന്യമായി കിട്ടുന്ന ആ സ്വപ്നവാഗ്ദാനം ബാലനായ കസ്തൂരിക്ക് അമ്മയിൽ നിന്നു കിട്ടിയിട്ടില്ല. കാരണം, കസ്തൂരിക്ക് 2 വയസ്സാകുമ്പോഴേക്കും അമ്മ മരിച്ചു. വളർന്ന് കസ്തൂരിരംഗനായപ്പോൾ, അമ്മമാർ പറഞ്ഞുപറ്റിച്ച എല്ലാ ഇന്ത്യൻ കുട്ടികളോടുമായി ആ പഴയ ബാലൻ പറഞ്ഞു: ‘അമ്പിളിമാമനെ പിടിച്ചു തരാട്ടോ’! കസ്തൂരി രംഗന്റെ ആ വാക്കിന്, സ്വപ്നത്തിന് ഇന്ത്യയെന്ന അമ്മരാജ്യം നൽകിയ ഓമനപ്പേരാണ് ചന്ദ്രയാൻ ! ഇന്ത്യയുടെ ആദ്യ ചാന്ദ്രദൗത്യമായ ചന്ദ്രയാൻ –1 ന് ആശയം സമ്മാനിച്ചയാൾ, പാലക്കാട് നല്ലേപ്പള്ളി അഗ്രഹാരത്തിലും തൃശൂർ ചാലക്കുടിയിലും വേരുകളുള്ള തമിഴ് ബ്രാഹ്മണ കുടുംബത്തിൽ ജനിച്ച ഡോ. കെ. കസ്തൂരിരംഗൻ ഇനി ഇന്ത്യയുടെ ആകാശത്തെ പൊന്നമ്പിളിത്തിളക്കം.