ഹമാസിനെ ആക്രമിച്ച മാതൃകയിൽ ‘റൈസിങ് ലയണും’; ഇനി നിഴൽ യുദ്ധമില്ല; നെതന്യാഹുവിനുണ്ട് ലക്ഷ്യങ്ങൾ; യുഎസ് ഭീഷണിക്ക് വഴങ്ങുമോ?

പലസ്തീൻ പ്രശ്നമാണ് ഇസ്രയേലും ഇറാനും തമ്മിലുള്ള ശത്രുതയുടെ ഒരു അടിസ്ഥാനം. ഇസ്രയേൽ രൂപീകരണകാലം മുതൽ ദശകങ്ങൾ ഈ വിഷയത്തിൽ അറബ്‌ രാജ്യങ്ങളും ഇസ്രയേലും സംഘർഷത്തിലായിരുന്നു. മധ്യപൂർവദേശം കൈവിട്ടുപോകാതിരിക്കാൻ യുഎസ്‌-യൂറോപ്യൻ ശക്തികൾ ചേർന്ന് ഇസ്രയേൽ പലസ്തീൻ മണ്ണിൽകൊണ്ടു സ്ഥാപിച്ചു. ഇതോടെ പശ്ചിമേഷ്യ വൻശക്തികൾക്ക്‌ എന്നും ചീട്ടിറക്കാനുള്ള ഒരു തന്ത്രപ്രധാന മേഖലയായി. പലസ്തീൻ വിഷയത്തിൽ ഇസ്രയേലുമായി യുദ്ധം ചെയ്ത ഈജിപ്ത്, ജോർദാൻ എന്നീ രാജ്യങ്ങൾ ഒടുവിൽ അവരുമായി രമ്യതയിലായി, സമാധാന ഉടമ്പടികളിൽ ഏർപ്പെട്ടു. യുഎഇ അടക്കമുള്ള ചില ഗൾഫ് രാജ്യങ്ങൾ യുഎസ് സമ്മർദങ്ങൾക്കു വഴങ്ങിയും ബിസിനസ് താൽപര്യങ്ങൾക്കുവേണ്ടിയും ഇസ്രയേലുമായി ബന്ധം സാധാരണ നിലയിലാക്കിയിട്ടുണ്ട്. സൗദി അറേബ്യയും ഈ വഴിക്കുതന്നെയാണെങ്കിലും ഗാസയിൽ ഇസ്രയേൽ ആക്രമണം ആരംഭിച്ചതോടെ മടിച്ചുനിൽക്കുകയാണ്. സിറിയയിലെ ഇറാൻ പിന്തുണയുള്ള ബഷാർ അൽ അസദ് ഭരണകൂടമായിരുന്നു മേഖലയിൽ മറ്റൊരു മുഖ്യ ഇസ്രയേൽവിരുദ്ധ ശക്തി.