‘ത്രെഡ്‌സി’ൽ അക്കൗണ്ട് തുടങ്ങി പോസ്റ്റിട്ട് അത് ഫെയ്സ്ബുക്കിലും ഇൻസ്റ്റയിലും ഷെയർ ചെയ്യുക, ഫോട്ടോ പോസ്റ്റ് ചെയ്ത് ട്വിറ്ററിലേക്കു ഷെയർ ചെയ്യുക... എന്തൊക്കെയാണ് ഓരോരുത്തരും കാണിച്ചുകൂട്ടുന്നതെന്ന് അവർക്കുതന്നെ മനസ്സിലാകാത്ത അവസ്ഥ. അതിനിടയിൽ ത്രെഡ്സിന്റെ ലോഗോ കണ്ട മലയാളികളെല്ലാം ഒരേ സ്വരത്തിൽ ചോദിച്ചു, ഇതു നമ്മുടെ ‘ക്ര’ അല്ലേ? ‘ക്ര’ എന്ന മലയാളം അക്ഷരവുമായി അത്രയേറെ ബന്ധമാണ് ലോഗോയ്ക്ക്. ‘ത്ര’ ആണെങ്കിലും ‘ക്ര’ ആണെങ്കിലും, അതുമല്ല ഇനി ജിലേബിയുടെ ആകൃതിയാണെങ്കിലും വിഷയം ത്രെഡ്സ് ലോഗോയെ ചുറ്റിപ്പറ്റിയല്ല, മറിച്ച് മസ്കുമായി ബന്ധപ്പെട്ടാണ്. ത്രെഡ്സ് മസ്കിന്റെ ‘കിളി’ പറത്തുമോ എന്നാതാണു ചോദ്യം.