ബംഗാളിലെ കൊലപാതക രാഷ്ട്രീയത്തെക്കുറിച്ച് സംസാരിക്കുന്നവർ ഒരിക്കലെങ്കിലും പറയാതെ പോകില്ല ആ സംഭവം– സെയിൻബാരി കൂട്ടക്കൊല. കഥകളും ഉപകഥകളും കാറ്റിലാകെ പരന്ന, ചോരയുടെ മണമുള്ള കൂട്ടക്കൊല. കുപ്രസിദ്ധമാണത്. തിരഞ്ഞെടുപ്പ് അക്രമങ്ങളിലൂടെയും കൊലപാതകങ്ങളിലൂടെയും കുപ്രസിദ്ധമായ ബംഗാളിന് മറക്കാനാവില്ല 1970ലെ ആ മാർച്ച് മാസവും. രാഷ്ട്രീയ കൊലപാതകങ്ങൾ ഇന്നും ആവർത്തിക്കുന്ന ബർദ്മാനിലാണ് ഒരു കുടുംബത്തിലെ ഒട്ടേറെ പേർ അന്നു ക്രൂരമായി കൊല്ലപ്പെട്ടത്. സെയിൻ കുടുംബത്തിലെ മൂത്തമകൻ നബകുമാർ സെയിന്റെ കണ്ണ് അക്രമികൾ ചൂഴ്ന്നെടുത്തു. വീട്ടുകാർ നോക്കിനിൽക്കെ, അനിയൻമാരായ പ്രണബിനെയും മലായിനെയും വെട്ടിക്കൊന്നു. ഒരു വർഷത്തിനു ശേഷം നബകുമാറും കൊല്ലപ്പെട്ടു.