ഭക്ഷ്യവസ്തുക്കളെ താപപ്രക്രിയയ്ക്കു വിധേയമാക്കി ആഹാരം പാകം ചെയ്യുന്ന രാസശാലയാണു സാക്ഷാൽ അടുക്കള. സ്റ്റൗ കൊളുത്തി പാചകവാതകം കത്തിക്കുന്നതോടെ അതു പ്രവർത്തനം തുടങ്ങും. പ്രൊപ്പേൻ, ബ്യൂട്ടേൻ എന്ന രണ്ടു മുഖ്യവാതകങ്ങളും മേമ്പൊടിയായി ചില്ലറ രാസവസ്തുക്കളും ചേർന്ന മിശ്രിതമാണു പാചകവാതകം. പാഠപുസ്തകത്തിൽ എഴുതി വച്ചതു പോലെ, വാതകം പരിപൂർണമായ ജ്വലനത്തിനു വിധേയമായാൽ അന്തിമ ഉൽപന്നങ്ങൾ കാർബൺഡയോക്സൈഡും നീരാവിയും മാത്രമാണ്. നിരുപദ്രവകാരികളായി കരുതാവുന്നവയാണ് ഇവ രണ്ടും.
