രാഷ്ട്രീയനേതാക്കളെ പരിചയപ്പെടുത്തുമ്പോൾ ‘മുഖവുര ആവശ്യമില്ല’ എന്ന് ഒരു വിശേഷണ സ്വഭാവത്തോടെ പറയുകയും എഴുതുകയും ചെയ്യാറുണ്ട്. എന്നാൽ കെ.കെ.ശൈലജയുടെ കാര്യത്തിൽ അതൊരു ഭംഗിവാക്കോ വിശേഷണമോ അല്ല. സിപിഎമ്മിന്റെ കേന്ദ്രകമ്മിറ്റി അംഗവും മുൻ ആരോഗ്യമന്ത്രിയുമായ ഇന്ത്യയിലെ പ്രമുഖയായ ഈ ഇടതുപക്ഷ വനിതാ നേതാവിനെ കേരളത്തിലെ ജനങ്ങൾക്കു പരിചയപ്പെടുത്തേണ്ട ഒരു ആവശ്യവും ഇല്ല. കേരളത്തിലെ കോവിഡ്, നിപ വ്യാപനത്തെ സമർഥമായി പ്രതിരോധിക്കുന്നതിനു നേതൃത്വം നൽകിയ ആരോഗ്യമന്ത്രി എന്ന നിലയിൽ കെ.കെ.ശൈലജ ലോകത്തിനുതന്നെ പരിചിതയായി മാറി. കേരളം സ്നേഹത്തോടെ ആ ഘട്ടത്തിൽ അവരെ ‘ടീച്ചറമ്മ’ എന്നു വിളിച്ചു. ഒന്നാം പിണറായി മന്ത്രിസഭയുടെ തിളക്കംതന്നെ വർധിപ്പിച്ചതിനു നേതൃപരമായ പങ്കു വഹിച്ച ശൈലജ ടീച്ചർ രണ്ടാം പിണറായി മന്ത്രിസഭയിൽനിന്ന് ഒഴിവാക്കപ്പെട്ടത് പലർക്കും അപ്രതീക്ഷിതമായി. അതിനു പിന്നാലെ, പ്രശസ്തമായ മഗ്സസെ പുരസ്കാരം ശൈലജയ്ക്കു തിരസ്കരിക്കേണ്ടി വന്നു. മന്ത്രിസഭയിൽനിന്ന് ഒഴിവാക്കപ്പെട്ടതും മഗ്സസെ പുരസ്കാരത്തോട് മുഖം തിരിക്കേണ്ടി വന്നതും സിപിഎം തീരുമാനപ്രകാരമായിരുന്നു. ഒരു പരിഭവവും പറയാതെ ശൈലജ അച്ചടക്കമുള്ള പാർട്ടി പ്രവർത്തകയായി തുടരുന്നു. രണ്ടു തീരുമാനങ്ങളുടെയും പിന്നിൽ എന്താണ് എന്നത് രാഷ്ട്രീയ കേന്ദ്രങ്ങളിൽ ഇപ്പോഴും സമസ്യയാണ്. ഈ സുദീർഘമായ അഭിമുഖത്തിൽ രണ്ടു വിഷയങ്ങളെ സംബന്ധിച്ചും കെ.കെ.ശൈലജ ആദ്യമായി ഒരു വിശദ പ്രതികരണത്തിനു തയാറായിരിക്കുകയാണ്. ഒപ്പം മന്ത്രി എന്ന നിലയിൽ തനിക്ക് ഉണ്ടായ നേട്ടങ്ങളെ സംബന്ധിച്ചും അതിനു പിന്നിലെ അധ്വാനത്തെക്കുറിച്ചും ടീച്ചർ വിശദമാക്കുന്നു. അതുവഴി, എല്ലാം പിആറല്ലേ എന്ന വിമർശത്തിനും മറുപടി നൽകുന്നു. മലയാള മനോരമ തീരുവന്തപുരം ചീഫ് ഓഫ് ബ്യൂറോ സുജിത് നായരോട് ‘ക്രോസ് ഫയറിൽ’ കെ.കെ.ശൈലജ സംസാരിക്കുന്നു.
