‘ഇന്ത്യ’ക്കാർ ബെംഗളൂരുവിൽ സമ്മേളിച്ചപ്പോൾ ബിജെപി ഡൽഹിയിൽ ദേശീയ ജനാധിപത്യ സഖ്യ യോഗം ചേർന്നു; ‘ഇന്ത്യ’ മുംബൈയിലെത്തിയപ്പോൾ കേന്ദ്രം പാർലമെന്റിന്റെ പ്രത്യേക സമ്മേളനം പ്രഖ്യാപിച്ചു. തിരഞ്ഞെടുപ്പുകൾ ഒരുമിച്ചാക്കുകയെന്ന പല കാലങ്ങളിലായി പല തവണ ചർച്ച ചെയ്ത വിഷയവും എടുത്തിട്ടു. ‘ഇന്ത്യ’യെന്ന പേരിനാണ് പ്രധാനമന്ത്രി നരേന്ദ്ര മോദിയും ബിജെപിയും ആദ്യം കുഴപ്പം പറഞ്ഞത്. പിന്നെ, പ്രതിപക്ഷ മുന്നണിയിലെ കൂട്ടുകെട്ട് കുഴപ്പംപിടിച്ചവരുടേതെന്നായി.
