പണ്ടൊക്കെ നാട്ടിൻപുറത്തു സൈക്കിളിലാണ് മീൻ എത്തിച്ചിരുന്നത്. കറുകച്ചാലിലെ വീട്ടിലേക്കു വരാൻ ഒരിറക്കവും അതുകഴിഞ്ഞ് ചെറിയൊരു കയറ്റവുമുണ്ട്. ഇറക്കത്തിൽ വരുമ്പോൾ മീൻകാരൻ ‘മീനേ, കൂയ്’ എന്നു കൂവും. അന്ന് ‘ഇന്നാരൻ’ എന്നായിരുന്നു വീട്ടിലെ പൂച്ചയുടെ പേര്. മീൻകാരന്റെ കൂവൽ കേട്ടാൽ ഇന്നാരനു പിന്നൊരു സമാധാനവും ഇല്ല, അച്ഛന്റെ ചുറ്റിനും കരഞ്ഞുകൊണ്ട് കറങ്ങും. മീൻ മണത്തുനോക്കിയാൽ ഫ്രഷ് ആണോയെന്ന് അച്ഛനും ഇന്നാരനും അറിയാം.