കേരളത്തിൽ വർഷങ്ങളുടെ ഇടവേളയ്ക്കു ശേഷമാണ് കോൺഗ്രസ് മണ്ഡലം പ്രസിഡന്റുമാരെ പ്രഖ്യാപിക്കുന്നത്. അതിനിടെ ഉയരുന്ന ചോദ്യങ്ങളേറെ. പാർട്ടിക്കുള്ളിലെ ഗ്രൂപ്പ് സമവാക്യങ്ങൾ തിരുത്തിയെഴുതപ്പെടുന്നുണ്ടോ എന്നതാണ് അതിൽ പ്രധാനം. മുൻകാലങ്ങളിലെ പോലെ ഗ്രൂപ്പ് പ്രശ്നങ്ങൾ വളരെ കുറവാണെന്നു പറയുമ്പോഴും രണ്ടാം തവണയും ഭരണം കൈവിട്ട ഒരു പാർട്ടിക്ക് ആ ചെറിയ പ്രശ്നം പോലും താങ്ങാനാകുമോ എന്ന ചോദ്യം പ്രസക്തം. അതിനിടെയാണ് പരമ്പരാഗത എ, ഐ ഗ്രൂപ്പുകളുടെ കുത്തകയിൽ കൈവച്ച് പുതിയൊരു ഗ്രൂപ്പ് എല്ലാ ജില്ലകളിലും രൂപപ്പെട്ടെന്ന വാർത്ത. ആ ഗ്രൂപ്പുമായി ചേർത്തുവച്ചിരിക്കുന്ന നേതാവ് തന്നെ ഇത് നിഷേധിച്ചെങ്കിലും ഇതിൽ എത്രമാത്രം യാഥാർഥ്യമുണ്ട്? ഈ കോലാഹലങ്ങൾക്കിടയിലാണ് ലോക്സഭാ തിരഞ്ഞെടുപ്പിന്റെ വരവ്.