പ്രകൃതിദത്ത പോളിമർ സംയുക്തങ്ങളായ റബർ, സെല്ലുലോസ്, ഷെല്ലക്ക് തുടങ്ങിയവ പുരാതനകാലം മുതലേ മനുഷ്യരെ ആകർഷിച്ചിരുന്നു. പ്രകൃതിജന്യമോ കൃത്രിമമോ ആയ ‘പോളിമർ’ സംയുക്തങ്ങളെയാണ് പൊതുവേ പ്ലാസ്റ്റിക്കുകളെന്നു വിളിക്കുന്നത്. ചെറിയ ‘മോണോമർ’ തന്മാത്രകൾ കൂട്ടിയോജിപ്പിച്ചാണ് പ്ലാസ്റ്റിക് ഉണ്ടാക്കുന്നത്. പിവിസി ഉദാഹരണമായെടുക്കാം. ‘വിനൈൽ ക്ലോറൈഡ്’ എന്ന മോണോമർ തന്മാത്രകളെ രാസപ്രവർത്തനത്തിനു (പോളിമറൈസേഷൻ) വിധേയമാക്കിയാണ് പിവിസി അഥവാ പോളി വിനൈൽ ക്ലോറൈഡ് നിർമിക്കുന്നത്.