യുദ്ധം, സാമ്പത്തിക മാന്ദ്യഭീതി..: 'രാജ്യാന്തര ശക്തി'യാകാൻ രൂപ? ഇതാണ് ആർബിഐ ലക്ഷ്യം

റഷ്യ–യുക്രെയ്ൻ യുദ്ധത്തിനു പിന്നാലെ ഇസ്രയേൽ–ഹമാസ് സംഘർ‌ഷവും രൂക്ഷമാകുന്നത് ആഗോള സമ്പദ്‍വ്യവസ്ഥയെ താറുമാറാക്കാൻ സാധ്യതയുണ്ടെന്നാണ് വിലയിരുത്തലുകൾ. യുഎസ് ഇതിനോടകം തന്നെ സാമ്പത്തികമാന്ദ്യത്തിന്റെ വക്കിലാണെന്ന് പ്രമുഖ ധനകാര്യ വിദഗ്ധനായ ജയിംസ് റിക്കാർഡ്സ് അടുത്തിടെ ചൂണ്ടിക്കാട്ടിയിരുന്നു. എന്നാൽ ഡോളറുമായുള്ള വിനിമയ നിരക്കിൽ അധികം താഴാതെ രൂപയെ പിടിച്ചു നിർത്താനുള്ള ശ്രമത്തിലാണ് റിസർവ് ബാങ്കും കേന്ദ്ര സർക്കാരും. സാമ്പത്തിക മാന്ദ്യം ലോകത്തെ തുറിച്ചു നോക്കുന്ന സാഹചര്യത്തിൽ 2023 അവസാനിക്കുന്നതു വരെയെങ്കിലും രൂപയ്ക്ക് മേലുള്ള കടുത്ത നിയന്ത്രണങ്ങൾ റിസർവ് ബാങ്ക് മാറ്റില്ല എന്നാണ് വിലയിരുത്തലുകൾ. എന്നാൽ, രൂപയെ പ്രതിരോധിക്കുക മാത്രമല്ല, ചെറുത്തുനിൽപ്പു കൂടി സാധ്യമാകുന്ന ചില നടപടികൾ റിസർവ് ബാങ്ക് ഇപ്പോൾ കൈക്കൊള്ളുന്നുണ്ട്. അതിലെ ഏറ്റവും പ്രധാനപ്പെട്ടതാണ് രൂപയെ രാജ്യാന്തരവൽക്കരിക്കൽ.