ഭാഗിക ശിവസേനയുടെ അധ്യക്ഷനായ ഉദ്ധവ് താക്കറെയുടെ ചോദ്യം ഇന്ത്യയിൽ മതനിരപേക്ഷ ജനാധിപത്യത്തിനു ഭാവിയില്ലെന്ന ആശങ്ക അൽപനേരം മാറ്റിവയ്ക്കാൻ ആരെയും പ്രേരിപ്പിക്കുന്നതാണ്. മതത്തിന്റെ അടിസ്ഥാനത്തിൽ വോട്ടു ചോദിക്കുന്നതു ശരിയാണോയെന്നാണ് ഉദ്ധവിന്റെ ചോദ്യം. മധ്യപ്രദേശിൽ ബിജെപിയെ ജയിപ്പിച്ചാൽ വോട്ടർമാർക്ക് അയോധ്യയിലേക്കു സൗജന്യ തീർഥയാത്രയെന്ന അമിത് ഷായുടെ വാഗ്ദാനം തെറ്റാണെന്ന് ഉദ്ധവിനു തോന്നി. ഷായ്ക്കെതിരെ നടപടി വേണമെന്ന് അദ്ദേഹം തിരഞ്ഞെടുപ്പു കമ്മിഷനോട് ആവശ്യപ്പെടുകയും ചെയ്തു. കർണാടകയിലെ തിരഞ്ഞെടുപ്പിൽ ബജ്റങ് ബലിയുടെ വിജയം പ്രഘോഷിക്കാൻ വോട്ടർമാരോടു പ്രധാനമന്ത്രി നരേന്ദ്ര മോദി ആഹ്വാനം ചെയ്തതും മതംപറഞ്ഞുള്ള വോട്ടുപിടിത്തമായി ഉദ്ധവ് വിലയിരുത്തുന്നു.