ചരിത്രത്തിന്റെ കണ്ണുകെട്ടുന്നു

നേതാജി സുഭാഷ് ചന്ദ്രബോസ് ഇന്ത്യൻ പൊതുഭാവനയിലെ അനശ്വര വീരനായകനാണ്. മറ്റു പല നേതാക്കളെയുംപോലെ നേതാജി ഒരിക്കലും വിസ്മൃതിയിലേക്ക് ആണ്ടുപോയില്ല. അദ്ദേഹത്തിന്റെ അസാധാരണ ജീവിതവും സമരവും മരണവുമെല്ലാം ഇന്നും ചർച്ച ചെയ്യപ്പെടുന്നു. ലക്ഷ്യം നേടാൻ സ്വീകരിച്ച പാതയും അതിന്റെ അപ്രായോഗികതയും ഫാഷിസ്റ്റുകളുടെ പിന്തുണ തേടിയതുമൊക്കെ വിമർശനത്തോടെ കാണുമ്പോഴും അദ്ദേഹത്തിന്റെ അപാരമായ രാജ്യസ്നേഹത്തിൽ ആർക്കും സംശയമില്ലായിരുന്നു. അതുകൊണ്ടുതന്നെയാണ് നേതാജിയുടെ ദുരൂഹമരണം ഇന്നും തീവ്രവേദനയോടെ മാത്രം നമ്മൾ ഓർക്കുന്നത്.