‘നവ്യയും മഞ്ജുവും അമ്പിളിയുമെല്ലാം കഷ്ടപ്പെട്ടാണ് നൃത്തം പഠിച്ചത്; സർക്കാർ വായ്പ കൊടുത്തിരുന്നോ?’: പിൻവലിച്ചാൽ തീരില്ല മന്ത്രിയുടെ ആർത്തി പ്രസ്താവന

തിരുവനന്തപുരം വെഞ്ഞാറമൂട് നടന്ന പ്രഫഷനൽ നാടക മത്സരത്തിന്റെ സമ്മാനദാനവേദിയിൽ വിദ്യാഭ്യാസമന്ത്രി വി.ശിവൻകുട്ടി നടത്തിയ പ്രസംഗം കേരളം കേട്ടതാണ്. ആധികാരികതയോടെ ഉറച്ച ശബ്ദത്തിൽ അദ്ദേഹം പറഞ്ഞത് ഇതായിരുന്നു– ‘‘14,000 കുട്ടികള്‍ പങ്കെടുക്കുന്ന സ്‌കൂള്‍ കലോത്സവത്തില്‍ ഏഴു മിനിറ്റ് നീളുന്ന നൃത്തം അവതരിപ്പിക്കാന്‍ സ്‌കൂള്‍ കലോത്സവത്തിലൂടെ പ്രശസ്ത നടിയായ വ്യക്തിയോട് അഭ്യര്‍ഥിച്ചപ്പോള്‍ അവര്‍ 5 ലക്ഷം രൂപ എന്റെ പ്രസ് സെക്രട്ടറിയോടു ചോദിച്ചു. എത്ര അഹങ്കാരം... പണത്തോടുള്ള ആർത്തി അവർക്ക് തീർന്നിട്ടില്ല. ഞാൻ വേണ്ടെന്നു പറഞ്ഞു.’’ മന്ത്രിയുടെ പ്രസ്താവന തുടക്കമിട്ടത് വലിയൊരു ചർച്ചയ്ക്കാണ്. ആർടിസ്റ്റുകളുടെ പ്രതിഫലം മുതൽ അവർ അനുഭവിക്കുന്ന ആനുകൂല്യങ്ങളും സ്വീകാര്യതയും മാത്രമല്ല അവർ നേരിടുന്ന അവഗണനയും വെല്ലുവിളികളും പ്രശ്നങ്ങളും വരെ അക്കമിട്ടു നിരത്തിയാണ് ഇതുമായി ബന്ധപ്പെട്ട ചർച്ച കൊഴുത്തത്.