തിരുവനന്തപുരം കൂട്ടക്കൊലയ്ക്കു പിന്നിലെ കാരണം: ലഹരിയെ പഴിക്കുമ്പോൾ ഇക്കാര്യം നാം കാണാതെ പോകരുത്...
Mail This Article
ആരോഗ്യരക്ഷാ രംഗത്തു കേരളം നടത്തിയ ആഗോള നിലവാരത്തിലുള്ള മുന്നേറ്റങ്ങൾ പ്രശസ്തമായ കേരള മോഡലിന്റെ നേട്ടങ്ങളിൽ ഏറ്റവും പ്രധാനപ്പെട്ടതാണ്. അത് ശാരീരികാരോഗ്യത്തിൽ മാത്രമായിപ്പോയോ എന്നു സംശയം തോന്നുന്ന വിധത്തിലാണ് കാര്യങ്ങളുടെ പോക്ക്. തിരുവനന്തപുരത്തുണ്ടായ കൂട്ടക്കൊലയ്ക്കു പിന്നിൽ ലഹരി ഉപയോഗവും ഒരു കാരണമാകാമെന്ന് ആളുകൾ പറയുന്നതു കേട്ടതാണ് ഇങ്ങനെയൊരു ആലോചനയ്ക്കു പിന്നിൽ. ഇത്തരം കേസുകളിൽ തെളിവുകൾ വരും മുൻപുതന്നെ മനുഷ്യർ ഇമ്മാതിരി തീർച്ചകളിലെത്താൻ ന്യായമുണ്ട്. തങ്ങളുടെ പരിചയങ്ങളിൽ, പലപ്പോഴും സ്വന്തം കുടുംബങ്ങളിലും ലഹരിക്ക് അടിമപ്പെട്ടവർ വർധിച്ചുവരുന്നു എന്ന ബോധ്യമാണ് ഇങ്ങനെ ഉറപ്പിക്കാൻ ആളുകളെ പ്രേരിപ്പിക്കുന്നത്. കാര്യങ്ങൾ അപകടകരമാംവിധം കൈവിട്ടുപോവുകയാണെന്നു വിശ്വസിക്കുന്നവരുടെ എണ്ണം കൂടിവരുന്നു; വേണ്ടത്ര കണക്കുകളുടെ പിൻബലമില്ലാതെ പോലും. ഇന്ത്യയിൽ ഏറ്റവുമധികം ലഹരി ഉപയോഗം നടക്കുന്ന 3 സംസ്ഥാനങ്ങൾ കേരളം, പഞ്ചാബ്, കശ്മീർ എന്നിവയാണെന്ന് ഒരു ഇംഗ്ലിഷ് പത്രത്തിന്റെ എഡിറ്റർ ഈയിടെ പറഞ്ഞതോർക്കുന്നു. ലഹരി ഉപയോഗം ഇത്രത്തോളം വർധിക്കാൻ മാത്രം പരിതാപകരമാണോ നമ്മുടെ മാനസികാരോഗ്യം എന്ന ആലോചനയ്ക്ക് ഇതു പ്രേരിപ്പിക്കുന്നു. ശരാശരി മാനസികാരോഗ്യമുള്ളവർ ഇത്തരം
