അതിർത്തിയിൽ യുദ്ധ ഭീഷണി, വിപണിയിൽ സമ്മർദം; ഈ ആഴ്ച ഓഹരിയിൽ എങ്ങനെ?

പഹൽഗാം ഭീകരാക്രമണത്തിനുശേഷം നിലനിൽക്കുന്ന സമ്മർദങ്ങൾ, കമ്പനികളുടെ നാലാം പാദഫലങ്ങൾ, രാജ്യത്തിന്റെ ചില സുപ്രധാന സാമ്പത്തിക ഡേറ്റകൾ തുടങ്ങിയവയാണ് ഈ ആഴ്ച (ഏപ്രിൽ 28– മേയ് 2) വിപണിയുടെ ചലനങ്ങൾ നിശ്ചയിക്കുന്നത്. മേയ് 1ന് മഹാരാഷ്ട്ര ദിനത്തിന്റെ അവധിയായതിനാൽ ഈ ആഴ്ച 4 ദിനങ്ങളിൽ മാത്രമായിരിക്കും വ്യാപാരമുണ്ടാവുക. അതിർത്തിയിലെ യുദ്ധനീക്കങ്ങൾക്കൊപ്പം അമേരിക്ക തുടങ്ങിവച്ച വ്യാപാരയുദ്ധത്തിൽ സുപ്രധാനമായ നീക്കങ്ങളുണ്ടായാലും വിപണിയിൽ അതിന്റെ പ്രകമ്പനമുണ്ടാകും. അതേസമയം, വിദേശനിക്ഷേപകർ ഇന്ത്യൻ ഓഹരി വിപണിയിലേക്കു തിരിച്ചെത്തുന്നതും കമ്പനികളുടെ പ്രവർത്തനഫലങ്ങൾ മികച്ചു നിൽക്കുന്നതും വിപണിക്ക് അനുകൂല ഘടകങ്ങളാണ്. ഇന്ത്യ–യുഎസ് ഉഭയകക്ഷി വ്യാപാരക്കരാറിലെ പുരോഗതിയും വിപണിക്ക് പ്രതീക്ഷയേകുന്നതാണ്.