നിക്ഷേപം ഡോളറിലും വളരും; ഇതാണ് പ്രവാസികൾ കാത്തിരുന്ന സൗകര്യം; ആഗോള സാമ്പത്തിക ശക്തിയാകാൻ ഇന്ത്യയ്ക്ക് ഇനി ഗിഫ്റ്റ് സിറ്റി

സിംഗപ്പൂർ അല്ലെങ്കിൽ ദുബായ് പോലുള്ള ഒരു രാജ്യാന്തര സാമ്പത്തിക കേന്ദ്രം സങ്കൽപിക്കുക- അതും ഇന്ത്യയിൽ. എൻആർഐകൾക്ക് വിദേശ പ്ലാറ്റ്ഫോമുകളെ ആശ്രയിക്കാതെ തന്നെ ഡോളറിൽ നിക്ഷേപിക്കാനും നികുതി ആനുകൂല്യങ്ങൾ ആസ്വദിക്കാനും ആഗോള അവസരങ്ങൾ നേടാനും കഴിയുന്ന ഒരു സ്ഥലം- അതാണ് ഗിഫ്റ്റ് (GIFT) സിറ്റി. ആഗോള സാമ്പത്തിക ശക്തികേന്ദ്രമാകാനുള്ള ഇന്ത്യയുടെ ധീരമായ പുതിയ ചുവടുവയ്പ്. ഗുജറാത്തിലെ അഹമ്മദാബാദിനു സമീപം സ്ഥിതി ചെയ്യുന്ന ഗിഫ്റ്റ് സിറ്റി ഒരു സ്മാർട് സിറ്റി മാത്രമല്ല; വിദേശത്തു നിക്ഷേപിക്കുന്നതിന്റെ നേട്ടങ്ങളെല്ലാം ഉപയോഗപ്പെടുത്തിക്കൊണ്ട്, സ്വന്തം പണം നാട്ടിൽ നിക്ഷേപിക്കാൻ ആഗ്രഹിക്കുന്ന എൻആർഐകൾക്ക് വലിയ അവസരം കൂടിയാണ് ഇതൊരുക്കുന്നത്. ഗിഫ്റ്റ് സിറ്റി എന്നാൽ ഗുജറാത്ത് ഇന്റർനാഷനൽ ഫിനാൻസ്– ടെക് സിറ്റി (Gujarat International Finance-Tech City) എന്നാണ്. ദുബായ്, ലണ്ടൻ, ഹോങ്കോങ് തുടങ്ങിയ ആഗോള സാമ്പത്തിക കേന്ദ്രങ്ങളുമായി മത്സരിക്കുന്നതിനു നിർമിച്ച ഇന്ത്യയിലെ ആദ്യത്തെ രാജ്യാന്തര ധനകാര്യ സേവന കേന്ദ്രമാണിത്. ബാങ്കുകൾ, ഇൻഷുറൻസ് കമ്പനികൾ, മ്യൂച്വൽ ഫണ്ടുകൾ,